മല്ലൂ ട്രാവലര്‍ യൂട്യൂബ് ചാനല്‍ ഉടമ ഷക്കീര്‍ സുബാനെതിരെയുള്ള പീഡന പരാതിയില്‍ സൗദി യുവതിയുടെ രഹസ്യ മൊഴി ഇന്ന് രേഖപ്പെടുത്തും. എറണാകുളം ജുഡീഷ്യല്‍ മജിസ്‌ട്രേറ്റ് കോടതിയിലാണ് സൗദി യുവതിയുടെ മൊഴി രേഖപ്പെടുത്തുന്നത്. കൊച്ചിയിലെ ഹോട്ടല്‍ മുറിയില്‍ വച്ച് പീഡിപ്പിച്ചെന്ന പരാതിയില്‍ എറണാകുളം സെന്‍ട്രല്‍ പൊലീസ് ഷക്കീറിനെതിരെ ജാമ്യമില്ലാ വകുപ്പ് പ്രകാരം കേസെടുത്തിരുന്നു.
കേസില്‍ പൊലീസ് അന്വേഷണം ഊര്‍ജ്ജിതമായി തുടരുന്നു. കേസില്‍ പ്രതിയായ ഷക്കീര്‍ സുബാന്‍ നിലവില്‍ വിദേശത്താണ്. ഇയാള്‍ ഇതുവരെ ചോദ്യം ചെയ്യലിന് ഹാജരായിട്ടില്ല. ഇയാള്‍ക്കെതിരെ പൊലീസ് കര്‍ശന നടപടി സ്വീകരിക്കാത്തതിലും ആക്ഷേപമുയര്‍ന്നിട്ടുണ്ട്. ഡല്‍ഹിയിലെ സൗദി എംബസിയിലും മുംബൈയിലെ സൗദി കോണ്‍സുലേറ്റിലും യുവതി പരാതി നല്‍കിയിട്ടുണ്ട്.
സൗദി എംബസിയിലും മുംബൈയിലെ സൗദി കോണ്‍സുലേറ്റിലും യുവതി നല്‍കിയ പരാതിയുടെ അടിസ്ഥാനത്തില്‍ കേന്ദ്ര രഹസ്യാന്വേഷണ ഏജന്‍സികളും കേസിന്റെ വിവരങ്ങള്‍ ശേഖരിച്ച് വരികയാണ്. സെപ്റ്റംബര്‍ 13ന് ആയിരുന്നു കേസിന് ആസ്പദമായ സംഭവം നടക്കുന്നത്. മീറ്റിംഗിനെന്ന് പറഞ്ഞ് കൊച്ചിയിലെ സ്വകാര്യ ഹോട്ടലില്‍ വിളിച്ച് വരുത്തി യൂട്യൂബര്‍ ഷക്കീര്‍ സുബാന്‍ തന്നെ പീഡിപ്പിച്ചുവെന്നാണ് യുവതിയുടെ പരാതി.