മദ്യം വാങ്ങുന്നതിലെ ബുദ്ധിമുട്ടുകള്‍ സംബന്ധിച്ച് നവകേരള സദസില്‍ നല്‍കിയ പരാതിയില്‍ നടപടി. പാലക്കാട് എലപ്പുള്ളി സ്വദേശി ഷിബു നല്‍കിയ പരാതിയിലാണ് നടപടി ഉണ്ടായിരിക്കുന്നത്. മദ്യം ലഭിക്കാന്‍ കിലോമീറ്ററുകളോളം സഞ്ചരിച്ചാലും തിരക്കും സ്ഥല പരിമിതിയും സൃഷ്ടിക്കുന്ന ബുദ്ധിമുട്ടുകള്‍ ചൂണ്ടിക്കാട്ടിയാണ് ഷിബു പരാതി നല്‍കിയത്.
പരാതിയ്ക്ക് പിന്നാലെ ബിവറേജസ് കോര്‍പ്പറേഷന്‍ തൃശൂര്‍ റീജിയണല്‍ ഓഫീസില്‍ നിന്ന് ഷിബുവിന് മറുപടിയെത്തി. ഷോപ്പില്‍ ഉടന്‍ തന്നെ പുതിയ കൗണ്ടറുകള്‍ തുറക്കുമെന്ന് സര്‍ക്കാര്‍ രേഖാമൂലം മറുപടി നല്‍കി. അതേസമയം മദ്യപന്റെ പരാതിയില്‍ നടപടി ഉണ്ടായതിനെ തുടര്‍ന്ന് സര്‍ക്കാരിനെതിരെ വിമര്‍ശനങ്ങളും ഉയര്‍ന്നിട്ടുണ്ട്.
പരാതി നല്‍കിയ മറ്റ് പലരെയും സര്‍ക്കാര്‍ അവഗണിച്ചതായാണ് പരാതി. എലപ്പുള്ളി സ്വദേശിയായ ട്രാന്‍സ്‌ജെന്‍ഡര്‍ വീട് നിര്‍മ്മിക്കാന്‍ സഹായം ആവശ്യപ്പെട്ട് നല്‍കിയ അപേക്ഷയില്‍ ഇതുവരെ സര്‍ക്കാര്‍ മറുപടി നല്‍കാത്തതിലും പ്രതിഷേധം ഉയരുന്നുണ്ട്.