കേരളത്തില്‍ അതിശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പ്. ഇന്നലെ രാത്രി പുറത്തിക്കിയ അറിയിപ്പില്‍ നാല് ജില്ലകളില്‍ ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്. കോട്ടയം, ഇടുക്കി, എറണാകുളം, തൃശൂര്‍ ജില്ലകളിലാണ് ഓറഞ്ച് അലര്‍ട്ട് പ്രഖ്യാപിട്ടുള്ളത്. ഏഴ് ജില്ലകളില്‍ യെല്ലോ അലര്‍ട്ടും പ്രഖ്യാപിച്ചു. തിരുവനന്തപുരം, കൊല്ലം, പത്തനംതിട്ട, ആലപ്പുഴ, പാലക്കാട്, മലപ്പുറം, കണ്ണൂര്‍ ജില്ലകളിലാണ് യെല്ലോ അലര്‍ട്ടുള്ളത്.
മണിക്കൂറില്‍ 40 കിലോമീറ്റര്‍ വേഗത്തില്‍ കാറ്റ് വീശാന്‍ സാധ്യതയുണ്ടെന്നും മുന്നറിയിപ്പുണ്ട്. ഉരുള്‍പൊട്ടല്‍, മണ്ണിടിച്ചില്‍, മലവെള്ളപ്പാച്ചില്‍ സാധ്യതയുള്ള പ്രദേശങ്ങളില്‍ താമസിക്കുന്നവര്‍ അധികൃതരുടെ നിര്‍ദേശാനുസരണം സുരക്ഷിതമായ സ്ഥലങ്ങളിലേക്ക് മാറി താമസിക്കണമെന്ന് നിര്‍ദേശം നല്‍കിയിട്ടുണ്ട്.
കൊല്ലം, പത്തനംതിട്ട, തിരുവനന്തപുരം ജില്ലകളില്‍ വ്യാപകമായി മഴ പെയ്യുന്നുണ്ട്. തിരുവനന്തപുരം വിതുര ബോണക്കാട് റോഡില്‍ മണ്ണിടിഞ്ഞ് ഗതാഗതം ഭാഗികമായി തടസ്സപ്പെട്ടു. ബുധനാഴ്ചയേ ഗതാഗതം പുനഃസ്ഥാപിക്കാന്‍ കഴിയൂ. വാമനപുരം നദിയില്‍ ജലനിരപ്പുയര്‍ന്നു. തിരുവനന്തപുരം വിഴിഞ്ഞത്ത് വാട്ടര്‍ സ്പൗട്ട് പ്രതിഭാസമുണ്ടായി.
Read more
ആകാശത്ത് കാര്‍മേഘങ്ങള്‍ ഇരുണ്ടുമൂടി കറുത്ത മേഘങ്ങള്‍ക്കിടയില്‍നിന്നു മിന്നല്‍ രൂപത്തില്‍ ഫൗണ്ടന്‍ പോലെ തോന്നിക്കുന്ന മേഘപാളി കടലിലേക്ക് ഊര്‍ന്നിറങ്ങും. ഇതോടെ കടല്‍ ഇളകിമറിഞ്ഞു ചുഴി രൂപപ്പെടും. കടലിന്റെ വിവിധ ഭാഗങ്ങളില്‍ കടല്‍വെള്ളം ഫണല്‍ രൂപത്തില്‍ ഏറെ ഉയരത്തില്‍ ഉയര്‍ന്നു പൊങ്ങും. മേഘങ്ങള്‍ക്കിടയില്‍ പെട്ടെന്നുണ്ടാകുന്ന മര്‍ദ വ്യത്യാസമാണു വാട്ടര്‍ സ്പൗട്ടിനു കാരണമാകുന്നത്.
