വയനാട് ദുരന്തത്തിന്റെ മറവില്‍ നടക്കുന്ന കരിമണല്‍ ഖനനം അവസാനിപ്പിക്കണമെന്ന് കെസി വേണുഗോപാല്‍ എംപി. ആലപ്പുഴ ചേര്‍ത്തലയില്‍ മാധ്യമങ്ങളോട് സംസാരിക്കുകയായിരുന്നു കെസി വേണുഗോപാല്‍. കരിമണല്‍ ഖനനം സംബന്ധിച്ച് ജനങ്ങളെയും ജനപ്രതിനിധികളെയും വിശ്വാസത്തിലെടുക്കുന്നില്ലെന്നും വേണുഗോപാല്‍ പറഞ്ഞു.
നടപ്പാക്കുന്നത് ഏകപക്ഷീയമായ തീരുമാനമാണ്. വയനാട് ദുരന്തത്തിന്റെ മറവിലാണ് ഖനനമെന്ന് സംശയിക്കുന്നു. മുഖ്യമന്ത്രി ഇടപെട്ട് പരിശോധിക്കണമെന്നും കെസി കൂട്ടിച്ചേര്‍ത്തു. തീരദേശ മേഖലയ്ക്കും കുട്ടനാടിനും ഒരുപോലെ സംരക്ഷണം ആവശ്യമാണെന്നും തീരദേശപാതയുടെ പേരില്‍ കുടിയൊഴിപ്പിക്കാന്‍ ശ്രമം നടക്കുന്നുവെന്നും വേണുഗോപാല്‍ ആരോപിച്ചു.
നിലവിലുള്ള തീരദേശ പാത വികസിപ്പിക്കുകയാണ് ആവശ്യം. കെ-റെയില്‍ ഉള്‍പ്പെടെയുള്ളവ സങ്കല്പ പദ്ധതികളാണെന്നും കെസി പറഞ്ഞു. കേന്ദ്ര സര്‍ക്കാരിനെതിരെയും കെസി ആക്ഷേപം ഉന്നയിച്ചു. കേന്ദ്ര സര്‍ക്കാര്‍ പദ്ധതിയില്‍ നിര്‍മിക്കുന്ന വീടുകളില്‍ സ്റ്റിക്കര്‍ പതിക്കുന്നത് അപഹാസ്യം. അടയാളങ്ങളും ചിഹ്നങ്ങളും പതിക്കരുതെന്നും കേന്ദ്ര സര്‍ക്കാരിന്റെ പണം ജനങ്ങളുടെ പണമാണെന്നും കെസി വ്യക്തമാക്കി.