വിവാദ വ്‌ളോഗര്‍മാരായ ഇ ബുള്‍ജെറ്റ് സഹോദരന്‍മാരുടെ വാഹനം അപകടത്തില്‍പ്പെട്ടു. ഇ ബുള്‍ജെറ്റ് സഹോദരന്‍മാരായ എബിനും ലിബിനും സഞ്ചരിച്ച വാഹനം എതിര്‍ ദിശയില്‍ വന്ന കാറുമായി കൂട്ടിയിടിച്ച് മൂന്ന് പേര്‍ക്ക് പരിക്കേറ്റു. പാലക്കാട് ചെറുപ്പുളശ്ശേരി ആലിക്കുളത്തിന് സമീപത്തായിരുന്നു അപകടം സംഭവിച്ചത്.
അപകടത്തില്‍ പരിക്കേറ്റവരെ പെരിന്തല്‍മണ്ണയിലെ സ്വകാര്യ ആശുപത്രിയിലേക്ക് മാറ്റിയിട്ടുണ്ട്. വ്‌ളോഗര്‍ സഹോദരന്മാര്‍ ചെറുപ്പുളശ്ശേരിയില്‍ നിന്ന് പാലക്കാട്ടേയ്ക്ക് പോകുകയായിരുന്നു. അപകടത്തില്‍ വ്‌ളോഗര്‍ സഹോദരന്മാരെ കൂടാതെ എതിര്‍ ദിശയില്‍ വന്ന കാറിലെ യാത്രക്കാരനും പരിക്കേറ്റിട്ടുണ്ട്.
നേരത്തെ വാഹനം രൂപമാറ്റം വരുത്തിയതിന്റെ പേരില്‍ വ്‌ളോഗര്‍ സഹോദരന്‍മാരായ എബിന്‍ വര്‍ഗീസിനും ലിബിന്‍ വര്‍ഗീസിനുമെതിരെ മോട്ടോര്‍ വാഹന വകുപ്പ് നടപടി സ്വീകരിച്ചിരുന്നു. ഇതേ തുടര്‍ന്ന് കണ്ണൂര്‍ ആര്‍ടിഒ ഉദ്യോഗസ്ഥരുമായി തര്‍ക്കത്തിലേര്‍പ്പെട്ട എബിനും ലിബിനും തുടര്‍ന്ന് ആര്‍ടി ഓഫീസില്‍ കയറി സംഘര്‍ഷമുണ്ടാക്കുകയും തുടര്‍ന്ന് പൊലീസ് അറസ്റ്റ് ചെയ്യുകയുമായിരുന്നു.
