കണ്ണൂര്‍ പാനൂരില്‍ ഭര്‍ത്താവ് ഭാര്യയെ കഴുത്തറുത്ത് കൊന്നു. പെരിങ്ങത്തൂര്‍ പടിക്കൂലോത്ത് സ്വദേശി രതി(57) ആണ് കൊല്ലപ്പെട്ടത്. സംഭവത്തില്‍ ഭര്‍ക്കാവ് മോഹനനെ പൊലീസ് കസ്റ്റഡിയിലെടുത്തിട്ടുണ്ട്.
ഇന്ന് രാവിലെ 11 മണിയോടെയായിരുന്നു സംഭവം. വിഷണുവിലാസം യുപി സ്‌കൂളിന് സമീപത്തുള്ള ഇവരുടെ വീട്ടില്‍ വെച്ചായിരുന്നു കൊലപാതകം നടന്നത്. വീടിന്റെ വാതില്‍ അടച്ച് പൂട്ടിയ ശേഷമാണ് കൊല ചെയ്തത്. വീട്ടിലെ കറിക്കത്തി ഉപയോഗിച്ചാണ് രതിയുടെ കഴുത്തറുത്ത് കൊലപ്പെടുത്തിയത്. നിലവിളി കേട്ട് ഓടിയെത്തിയ നാട്ടുകാര്‍ വാതില്‍ തകര്‍ത്ത് അകത്ത് കയറുകയായിരുന്നു.
മോഹനനെ ചൊക്ലി പൊലീസ് എത്തി കസ്റ്റഡിയിലെടുത്തു. കോയമ്പത്തൂരില്‍ ചായക്കച്ചവടം നടത്തി വരികയാണ് ഇയാള്‍. കൊലപാതകത്തിന്റെ കാരണം എന്താണെന്ന് വ്യക്തമായിട്ടില്ല. മൃതദേഹം തലശ്ശേരി ജനറല്‍ ആശുപത്രി മോര്‍ച്ചറിയിലേക്ക് മാറ്റിയിരിക്കുകയാണ്. മക്കള്‍ ധനുഷ് , ധനിഷ എന്നിവരാണ്.