പെരുമ്പാവൂരിലെ പ്ലൈവുഡ് ഫാക്ടറിയില്‍ മാലിന്യം കത്തിക്കുന്ന തീച്ചൂളയിലേക്ക് അതിഥി തൊഴിലാളി വീണു. കൊല്‍ക്കത്ത സ്വദേശി നസീറാണ് മാലിന്യക്കുഴിയിലെ തീച്ചൂളയിലേക്ക് വീണുപോയത്. ഇയാളെ പുറത്തെടുക്കാനുള്ള ശ്രമങ്ങള്‍ തുടരുകയാണ്. ഇന്ന് രാവിലെ ഏഴ് മണിയോടെയാണ് സംഭവം.
പെരുമ്പാവൂര്‍ ഓടക്കാലി ജംഗ്ഷനിലുള്ള യൂണിവേഴ്‌സല്‍ പ്ലൈവുഡിലെ ഇതര സംസ്ഥാന തൊഴിലാളിയാണ് മാലിന്യക്കൂമ്പാരത്തിലേക്ക് പതിച്ചത്. പ്ലൈവുഡ് ഉത്പന്നങ്ങളുടെ വേസ്റ്റ് ഈ ഭാഗത്തിട്ടാണ് കത്തിക്കുന്നത്.
ഓരോ തവണയും കത്തിച്ചതിന് ശേഷം അതിന് മുകളില്‍ മണ്ണിട്ട് നികത്തി വീണ്ടും കത്തിക്കുകയാണ് പതിവ്. മരത്തിന്റെ വേസ്റ്റാണ് കത്തിക്കുന്നത്. എല്ലാ ദിവസവും രാത്രി ഈ കുഴി നനക്കുകയും ചെയ്യും. തീപിടുത്തം ഒഴിവാക്കാനാണ് ഇങ്ങനെ ചെയ്യുന്നത്.
ഇയാളെ ഇതുവരെ കണ്ടെത്താനായിട്ടില്ല. 15 അടി താഴ്ചയുള്ള മാലിന്യക്കുഴിയില്‍ വീണുപോയ തൊഴിലാളിയെ പുറത്തെടുക്കാനുള്ള ശ്രമങ്ങള്‍ തുടരുകയാണ്. ഇവിടെ താത്കാലികമായി ജോലിക്ക് വന്നയാളാണെന്നാണ് അറിയാന്‍ സാധിച്ചത്. ആറ് ഫയര്‍ എഞ്ചിനുകള്‍ എത്തിച്ച് രക്ഷാപ്രവര്‍ത്തനം പുരോഗമിച്ചു കൊണ്ടിരിക്കുകയാണ്.