ഗാന്ധിജിയുടെ മതേതരത്വത്തെ കുറിച്ചുള്ള സങ്കല്‍പം ഏറ്റവും അപകടത്തിലായ ഒരു കാലത്താണ് നാം ജീവിക്കുന്നത്. വിഭജനത്തിന്‍റെ മുറിപ്പാടുകള്‍ അതിനു ശേഷവും ഇന്ത്യന്‍ ജനതയില്‍ തുടര്‍ന്നിരുന്നുവെങ്കിലും അത് വീണ്ടും ഏറ്റവും ക്രൂരമായ രീതിയില്‍ ഉയിര്‍ത്തെഴുന്നേല്‍ക്കുന്ന കാലമാണിതെന്നും പ്രശസ്ത കവി സച്ചിദാനന്ദന്‍ അഭിപ്രായപ്പെട്ടു. രാഷ്ട്ര പിതാവ് മഹാത്മാഗാന്ധിയുടെ 150ാം ജന്മവാര്‍ഷികത്തോടനുബന്ധിച്ച് ഏഷ്യാനെറ്റ് ന്യൂസ് സംഘടിപ്പിച്ച പ്രത്യേക പരിപാടിയില്‍ പങ്കെടുക്കുകയായിരുന്നു സച്ചിദാനന്ദന്‍.
സച്ചിദാനന്‍റെ വാക്കുകൾ:
മതമൈത്രി അഥവാ ഗാന്ധിജിയുടെ മതേതരത്വത്തെ കുറിച്ചുള്ള സങ്കല്‍പം ഏറ്റവും അപകടത്തിലായ ഒരു കാലത്താണ് നാം ജീവിക്കുന്നത്. വിഭജനത്തിന്‍റെ മുറിപ്പാടുകള്‍ അതിനു ശേഷവും ഇന്ത്യന്‍ ജനതയില്‍ തുടര്‍ന്നിരുന്നുവെങ്കിലും അത് വീണ്ടും ഏറ്റവും ക്രൂരമായ രീതിയില്‍ ഉയിര്‍ത്തെഴുന്നേല്‍ക്കുന്ന കാലമാണിതെന്ന് ഞാന്‍ കരുതുന്നു. ഇന്ത്യയില്‍ തന്നെ തനിച്ച്, ജീവിച്ച്, വളര്‍ന്ന ഹിന്ദു അല്ലാത്ത വിവിധ മതങ്ങളില്‍ പെട്ട ആളുകളെ അന്യരായോ വിദേശികളായോ മുദ്രകുത്തുകയോ അവര്‍ക്കെതിരെ ഉപയോഗിക്കാവുന്ന രീതിയില്‍ നിയമപരമായ ആയുധങ്ങള്‍ പോലും രൂപപ്പെടുത്തുകയും ചെയ്യുന്ന ഒരു ഭരണകൂടമാണ് ഇന്ന് ഇന്ത്യയില്‍ ഉള്ളത്.
അതുകൊണ്ടു തന്നെ ഗാന്ധിയുടെ ആദര്‍ശങ്ങളില്‍ ആദ്യം അപകടത്തിലായത് അദ്ദേഹത്തിന്‍റെ സങ്കല്‍പ്പത്തിലുള്ള മതേതരത്വമായിരുന്നു. അതിനെ സങ്കല്‍പ്പം എന്ന് പറയുന്നത് അത് പാശ്ചാത്യ മതേതരത്വ സങ്കല്‍പ്പത്തില്‍ നിന്ന് ഭിന്നമായതു കൊണ്ടാണ്. കാരണം, ഭരണകൂടം മതപരമായ കാര്യങ്ങളില്‍ നിന്ന് അകന്നു നില്‍ക്കുക എന്നത് മാത്രമല്ല ഉദ്ദ്യേശിച്ചത്, മറിച്ച് പൗരസമൂഹത്തിനകത്ത് എല്ലാ മതങ്ങളും, മതവിശ്വാസങ്ങളില്ലാത്തവര്‍ക്കും ഒന്നിച്ച് സാഹോദര്യത്തോടെ ജീവിക്കുന്ന ഒരു സങ്കല്‍പ്പമാണത്. ഈ രണ്ട് അര്‍ത്ഥത്തിലും മതേതരത്വം ഇന്ന് അപകടത്തിലാണ്. ഭരണകൂടം കൂടുതല്‍ കൂടുതല്‍ മതാധിപത്യപരമായി മാറുന്നു. പൗരസമൂഹത്തില്‍ മതവൈരം വളര്‍ത്തുന്ന രീതിയിലുള്ള നയങ്ങളും സമീപനങ്ങളും വര്‍ദ്ധിച്ചു വരുന്നു. മതസ്പര്‍ദ്ധയുടെ പേരിലുള്ള ലഹളകളും കൊലപാതകങ്ങളും അന്യവത്കരണങ്ങളും വര്‍ദ്ധിച്ചു വരുന്നു. മതേതരത്വം ഏറ്റവുമധികം ഭീഷണി നേരിടുന്നത്, നിര്‍ഭാഗ്യവശാല്‍ രാജ്യത്തിന്‍റെ ഭരണകൂടത്തില്‍ നിന്നും അതിന്‍റെ പ്രത്യയശാസ്ത്രങ്ങളില്‍ നിന്നുമാണ് എന്ന് ഞാന്‍ വിചാരിക്കുന്നു.