ഒരു ലക്ഷം കുടുംബങ്ങള്‍ക്ക് സഹായമെത്തിക്കാനുള്ള അമിതാബ് ബച്ചന്റെ “വി ആര്‍ വൺ” പദ്ധതിക്ക് കല്യാൺ ജൂവലേഴ്‌സ് പിന്തുണ പ്രഖ്യാപിച്ചു. ഒരു ലക്ഷം ദിവസവേതന തൊഴിലാളികള്‍ക്കാണ് അമിതാബ് ബച്ചന്റെ നേതൃത്വത്തില്‍ സഹായമെത്തിക്കുന്നത്. ഇതില്‍ 50,000 പേരുടെ കുടുംബങ്ങള്‍ക്കുള്ള സഹായമാണ് കല്യാൺ ജൂവലേഴ്‌സ് നല്‍കുന്നത്.
സ്വര്‍ണാഭരണ നിര്‍മ്മാണ മേഖലയിലും സിനിമാ മേഖലയിലും പണിയെടുക്കുന്ന ദിവസവേതനക്കാരുടെ കുടുംബങ്ങള്‍ക്കാണ് കല്യാൺ ജൂവലേഴ്‌സ് സഹായമെത്തിക്കുത്. കേരളത്തിലെ ജൂവലറി മാനുഫാക്‌ചേഴ്‌സ് അസോസിയേഷന്‍, കോയമ്പത്തൂര്‍ ജൂവല്ലേഴ്‌സ് അസോസിയേഷന്‍, മുംബൈയിലെ ജെംസ് ആന്റ് ജൂവലറി എക്‌സ്‌പോര്‍ട്ട് പ്രൊമോഷന്‍ കൗൺസില്‍ എന്നീ സംഘടനകള്‍ നിര്‍ദ്ദേശിക്കുന്ന സ്വര്‍ണാഭരണ നിര്‍മ്മാണ മേഖലയിലെ ദിവസവേതനക്കാര്‍ക്കാണ് “ഗോള്‍ഡ്‌സ്മിത് റിലീഫ് ഫണ്ട്” വഴി സഹായമെത്തിക്കുക. സിനിമ മേഖലയിലെ ഗുണഭോക്താക്കളെ ഫെഫ്ക കണ്ടെത്തി നിര്‍ദ്ദേശിക്കും.
കൂടാതെ കോവിഡ് പ്രതിരോധത്തെക്കുറിച്ച് അവബോധം സൃഷ്ടിക്കുതിനായി നിര്‍മ്മിക്കുന്ന പരസ്യചിത്രത്തിനും കല്യാൺ പിന്തുണ പ്രഖ്യാപിച്ചു. അമിതാബ് ബച്ചന് പുറമേ രജനികാന്ത്, മമ്മൂട്ടി, മോഹന്‍ലാല്‍, രൺബീര്‍ കപൂര്‍, ചിരഞ്ജീവി, ശിവ് രാജ്കുമാര്‍, പ്രിയങ്ക ചോപ്ര, ആലിയ ഭട്ട് തുടങ്ങിയവര്‍ ഈ പരസ്യചിത്രത്തില്‍ വേഷമിടും.
മുമ്പുണ്ടായിട്ടില്ലാത്തവിധം ആഗോള തലത്തിലുള്ള ഒരു മഹാമാരിയിലൂടെയാണ് മനുഷ്യരാശി കടുപോകുന്നതെന്ന് കല്യാൺ ജൂവലേഴ്‌സ് ചെയര്‍മാനും മാനേജിങ് ഡയറക്ടറുമായ ടി.എസ്.കല്യാണരാമന്‍ പറഞ്ഞു. വലിയ വെല്ലുവിളിയുടെ ഈ സമയത്ത് അമിതാബ് ബച്ചനൊപ്പം ചേർന്ന് ദിവസവേതനക്കാരായ തൊഴിലാളി കുടുംബങ്ങള്‍ക്ക് ആശ്വാസമേകുതിനാണ് ഈ സഹായം നല്‍കുന്നതെന്നും അദ്ദേഹം പറഞ്ഞു.
