തമിഴ്നാട്ടില്‍ തള്ളിയ ആശുപത്രിമാലിന്യം ഉള്‍പ്പടെയുള്ളവ മാറ്റാമെന്ന് ഉറപ്പ് നല്‍കി കേരളം. ബയോമെഡിക്കല്‍ മാലിന്യങ്ങള്‍ ഉള്‍പ്പടെയുള്ളവ മൂന്നുദിവസത്തിനകം മാറ്റണമെന്ന ദേശീയ ഹരിതട്രിബ്യൂണലിന്റെ ഉത്തരവിനെത്തുടര്‍ന്നാണ് കേരളത്തിന്റെ തീരുമാനം. ഇന്നലെ സംഭവസ്ഥലം സന്ദര്‍ശിച്ച മലിനീകരണ നിയന്ത്രണബോര്‍ഡ്, നഗരസഭ, ഇമേജ് എന്നിവയുടെ പ്രതിനിധികള്‍ നല്‍കുന്ന റിപ്പോര്‍ട്ടിന്റെ അടിസ്ഥാനത്തിലാകും മാലിന്യങ്ങള്‍ നീക്കം ചെയ്യുക.
തിരുവനന്തപുരം റീജണല്‍ കാന്‍സര്‍ സെന്റര്‍, ക്രെഡന്‍സ് ആശുപത്രി, കോവളം ലീല ഹോട്ടല്‍ എന്നിവിടങ്ങളിലെ മാലിന്യം ഉള്‍പ്പെടെ തിരുനെല്‍വേലിക്കു സമീപം തള്ളിയതിനെതിരേയാണ് ട്രിബ്യൂണന്‍ കടുത്ത നിലപാട് സ്വീകരിച്ചത്. മൂന്നുദിവസത്തിനകം മാലിന്യം പൂര്‍ണമായും നീക്കാനാണ് ട്രിബ്യൂണന്‍ നിര്‍ദേശം.
ഇതിന്റെ അടിസ്ഥാനത്തിലുള്ള നടപടി ഇന്നും നാളെയുമായി പൂര്‍ത്തിയാക്കും. മാലിന്യംനീക്കിയശേഷം ഉത്തരവാദികളില്‍നിന്ന് ചെലവ് ഈടാക്കാനും നിയമനടപടി എടുക്കാനുമാണ് തീരുമാനം. മാലിന്യംതള്ളിയത് നീക്കംചെയ്തതിനുള്ള ചെലവായ 70,000 രൂപ കേരളം തമിഴ്നാടിന് കേരളം നല്‍കും.
Read more
ഈ മാലിന്യമെത്തിയതിനെക്കുറിച്ച് അന്വേഷിക്കാന്‍ തദ്ദേശവകുപ്പും പ്രത്യേകസംഘത്തെ നിയോഗിച്ചു. ഹരിതട്രിബ്യൂണലിന്റെ ഉത്തരവിന്റെ അടിസ്ഥാനത്തില്‍ സംസ്ഥാന ചീഫ് സെക്രട്ടറിയും മലിനീകരണ നിയന്ത്രണ ബോര്‍ഡും ആരോപണവിധേയമായ സ്ഥാപനങ്ങളില്‍നിന്ന് റിപ്പോര്‍ട്ടുതേടിയിട്ടുണ്ട്. അതേസമയം, മാലിന്യംതള്ളിയതുമായി ബന്ധപ്പെട്ട് തിരുനെല്‍വേലിയില്‍ രണ്ടുപേരെ പോലീസ് പിടികൂടിയിട്ടുണ്ട്. ഇവര്‍ക്ക് എങ്ങനെയാണ് മാലിന്യംലഭിച്ചതെന്നത് അന്വേഷണം നടക്കുകയാണെന്ന് തമിഴ്‌നാട് പൊലീസ് പറഞ്ഞു.
