സംസ്ഥാനത്ത് സാമ്പത്തിക പ്രതിസന്ധി രൂക്ഷമായതിനെ തുടർന്ന് ഏർപ്പെടുത്തിയ ട്രഷറി നിയന്ത്രണങ്ങളിൽ നാലിനങ്ങൾക്ക് ഇളവ് നൽകാൻ സർക്കാർ തീരുമാനം. വെള്ളക്കരം, ടെലിഫോൺ ചാർജ്, വാടക, റേഷൻ ഡീലർമാരുടെ കമ്മീഷൻ എന്നിവയ്ക്കാണ് ഇളവ് ഉണ്ടാകുക. ഇവ വിതരണം ചെയ്യാൻ അനുവദിച്ചു. തിങ്കളാഴ്ച ട്രഷറി ഡയറക്ടർ ഇത് സംബന്ധിച്ച നിർദേശം ട്രഷറികൾക്ക് നൽകി.
നവംബർ 14ദ-നാണ് സംസ്ഥാനത്ത് കർശന ട്രഷറി നിയന്ത്രണം പ്രാബല്യത്തിൽ വന്നത്. തൊട്ടടുത്ത ദിവസം 31 ഇനങ്ങൾ ഒഴികെ ബാക്കി മുഴുവൻ ഇടപാടുകൾക്കും നിയന്ത്രണം ഏർപ്പെടുത്തി ഡയറക്ടർ ട്രഷറികൾക്ക് ഉത്തരവ് നൽകുകയും ചെയ്തു. അന്ന് ഇളവ് നൽകിയ പട്ടികയിലേക്കാണ് പുതുതായി നാല് ഇനങ്ങൾ കൂടി ഉൾപ്പെടുത്തിയത്. മറ്റ് മുഴുവൻ ഇടപാടുകളും കർശനമായി തടയണമെന്നാണ് നിർദേശം. തദ്ദേശ സ്ഥാപനങ്ങളുടെ ബില്ലുകൾക്കും ചെക്കുകൾക്കും നിയന്ത്രണം ബാധകമാക്കി. ഈ നിയന്ത്രണം തദ്ദേശ പദ്ധതികളെ ഗുരുതരമായി ബാധിച്ചിട്ടുണ്ട്.