ബഫണ്‍ സോണ്‍ വിഷയത്തില്‍ കൃത്യമായ വസ്തുതകള്‍ ജനങ്ങളിലേക്ക് എത്തിക്കുവാനും മാറി മാറി വന്ന സര്‍ക്കാരുകള്‍ ഈ വിഷയത്തില്‍ എടുത്ത ജനവഞ്ചന തുറന്നു കാട്ടുന്നതിന് വേണ്ടിയും സംസ്ഥാന സര്‍ക്കാരില്‍ നിക്ഷിപ്തമായിട്ടുള്ള അധികാരം ഉപയോഗിച്ചുകൊണ്ട് ഈ പ്രശ്‌നം പരിഹരിക്കാന്‍ സാധിക്കും എന്ന യാഥാര്‍ഥ്യം ജനങ്ങളിലേക്ക് എത്തിക്കുന്നതിനുമായി സംസ്ഥാന വ്യാപകമായി കിഫ നടത്തുന്ന കര്‍ഷക പ്രധിരോധ സദസ്സുകള്‍ക്ക് 2023 ജനുവരി 2 തിങ്കളാഴ്ച വൈകിട്ട് 3.30ന് മലബാര്‍ വന്യജീവി സങ്കേതത്തിന്റെ കവാടമായ കോഴിക്കോട് ജില്ലയിലെ കക്കയത്ത് തുടക്കമാകും.
അന്നേ ദിവസം 3.30 ന് കക്കയം പഞ്ചവടി പാലത്തിന്റെ സമീപത്ത് നിന്നും ആരംഭിക്കുന്ന കര്‍ഷക പ്രതിരോധ മാര്‍ച്ച് കക്കയം അങ്ങാടിയില്‍ സമാപിക്കുകയും അതിനുശേഷം നടക്കുന്ന പൊതു സമ്മേളനം കിഫ ചെയര്‍മാന്‍ അലക്‌സ് ഒഴുകയില്‍ ഉദ്ഘാടനം ചെയ്യും.
ഈ വിഷയത്തില്‍ പൊതുജനങ്ങള്‍ക്കുള്ള സംശയങ്ങള്‍ ദൂരീകരിക്കുന്നതിനുള്ള അവസരവും പ്രസ്തുത യോഗത്തില്‍ ഉണ്ടായിരിക്കുന്നതാണ്. ജാതിമത വര്‍ഗ്ഗ വര്‍ണ്ണ ഭേദമന്യേ മലയോര മേഖലയിലെ മുഴുവന്‍ ജനങ്ങളും അതിജീവനത്തിനായുള്ള ഈ പ്രതിരോധ സദസ്സില്‍ പങ്കെടുക്കണമെന്ന് ടീം കിഫ അഭ്യര്‍ത്ഥിച്ചു.