സിപിഎം നേതാക്കളുടെ ഭാര്യമാരെ സാമൂഹ്യമാധ്യമങ്ങളിലൂടെ അധിക്ഷേപിച്ച കേസില്‍ ജാമ്യം ലഭിച്ച കോണ്‍ഗ്രസ് പ്രവര്‍ത്തകന്‍ വീണ്ടും അറസ്റ്റില്‍. സാമൂഹ്യമാധ്യമത്തിലൂടെ അപകീര്‍ത്തികരമായ ദൃശ്യങ്ങള്‍ പ്രചരിപ്പിച്ചതിനാണ് നെയ്യാറ്റിന്‍കര ചെങ്കല്‍ സ്വദേശി എബിന്‍ കോടങ്കരയെ പൊലീസ് അറസ്റ്റ് ചെയ്തത്. പാലക്കാട് ശ്രീകൃഷ്ണപുരം പൊലീസ് തലസ്ഥാനത്തെത്തിയാണ് ഇയാളെ അറസ്റ്റ് ചെയ്തത്.
സിപിഎം നേതാക്കളുടെ ഭാര്യമാരെ സാമൂഹ്യമാധ്യമങ്ങളിലൂടെ അധിക്ഷേപിച്ച കേസില്‍ ഇയാള്‍ക്ക് കഴിഞ്ഞ ദിവസമാണ് കോടതി ജാമ്യം അനുവദിച്ചത്. ഇതിന് പിന്നാലെയാണ് സമാനമായ മറ്റൊരു കേസില്‍ എബിന്‍ അറസ്റ്റിലായിരിക്കുന്നത്. കോട്ടയം കുഞ്ഞച്ചന്‍ എന്ന ഫേസ്ബുക്ക് അക്കൗണ്ട് വഴി ഡിവൈഎഫ്‌ഐ വനിതാ നേതാവിന്റെ ചിത്രങ്ങള്‍ മോര്‍ഫ് ചെയ്ത് അശ്ലീല വീഡിയോ നിര്‍മ്മിച്ച് പ്രചരിപ്പിച്ചുവെന്ന പരാതിയിലാണ് ശ്രീകൃഷ്ണപുരം പൊലീസ് ഇയാളെ അറസ്റ്റ് ചെയ്തത്.
അന്തരിച്ച സിപിഎം നേതാവ് പി ബിജുവിന്റെ ഭാര്യ ഹര്‍ഷ, എഎ റഹീം എംപിയുടെ ഭാര്യ അമൃത റഹീം എന്നിവര്‍ നല്‍കിയ പരാതിയില്‍ കഴിഞ്ഞ ദിവസം സൈബര്‍ പൊലീസ് അറസ്റ്റ് ചെയ്തിരുന്നു. അമൃത റഹീം ഫേസ്ബുക്കില്‍ പോസ്റ്റ് ചെയ്തിരുന്ന ചിത്രങ്ങള്‍ മോര്‍ഫ് ചെയ്ത് പ്രചരിപ്പിച്ചുവെന്നതായിരുന്നു കേസ്. കോട്ടയം കുഞ്ഞച്ചന്‍ എന്ന അക്കൗണ്ടിലൂടെയാണ് ഇയാള്‍ ചിത്രങ്ങള്‍ പ്രചരിപ്പിച്ചത്. ഇയാള്‍ക്കെതിരെ പൊലീസ് ദുര്‍ബലമായ വകുപ്പുകളാണ് ചുമത്തിയതെന്ന വിമര്‍ശനത്തോടെയാണ് കോടതി ജാമ്യം അനുവദിച്ചത്.