ദേശീയ ഗ്രാമീണ തൊഴിലുറപ്പ് പദ്ധതിയുടെ വേതനം പുതുക്കി. നിശ്ചയിച്ചു. കേരളത്തിലെ തൊഴിലുറപ്പുകാരുടെ ദിവസക്കൂലിയില്‍ 20 രൂപയുടെ വര്‍ധനവാണ് ഉണ്ടായിരിക്കുന്നത്. നിലവില്‍ 291 രൂപയാണ് സംസ്ഥാനത്തെ തൊഴിലുറപ്പ് കൂലി. പുതുക്കിയ നിരക്ക് പ്രകാരം ദിവസക്കൂലി 311 രൂപയായി ഉയരും.
കേരളത്തിന് പുറമെ ഹരിയാന, ഗോവ, എന്നിങ്ങനെ പത്ത് സംസ്ഥാനങ്ങളിലെ തൊഴിലുറപ്പ് കൂലിയും വര്‍ധിപ്പിച്ചു. ഏറ്റവും കൂടുതല്‍ വര്‍ധനവ് ഗോവയിലാണ്. ഗോവയില്‍ 21 രൂപയാണ് കൂട്ടിയിരിക്കുന്നത്. ഹരിയാനയിലെ നിരക്ക് 331 രൂപയാക്കി. നേരത്തെ 300 രൂപയായിരുന്നു. സംസ്ഥാനങ്ങളില്‍ നിലവിലുള്ള കൂലിയുടെ അഞ്ച് ശതമാനത്തിലധികം വര്‍ദ്ധനവാണ് ഉണ്ടായിരിക്കുന്നത്.
അതേ സമയം മണിപ്പൂര്‍ ,തൃപുര, മിസോറം എന്നിവിടങ്ങളില്‍ ഒരു രൂപപോലും വര്‍ധിപ്പിച്ചിട്ടില്ല. നിലവില്‍ ഹരിയാനയിലാണ് തൊഴിലുറപ്പ് കൂലി ഏറ്റവും കൂടുതല്‍. മധ്യപ്രദേശിലും ഛത്തീസ്ഖഢിലുമാണ് ഏറ്റവും കുറവ് കൂലി ലഭിക്കുന്നത്. ഈ രണ്ടു സംസ്ഥാനങ്ങളിലും 204 രൂപയാണ് ദിവസക്കൂലി.