സംസ്ഥാനത്ത് വന്‍ നികുതി നല്‍കി വാങ്ങുന്ന മദ്യം പകുതി വിലയില്‍ ലഭിച്ചാലോ? മദ്യപന്മാര്‍ക്ക് സന്തോഷം നല്‍കുന്ന ഒരു വാര്‍ത്തയാണ് പുറത്തുവന്നിരിക്കുന്നത്. സംസ്ഥാനത്തെ ബീവറേജസ് ഔട്ട്‌ലെറ്റുകളില്‍ ഇനി പകുതി വിലയ്ക്ക് മദ്യം ലഭിക്കും. സ്റ്റോക്ക് ക്ലിയറന്‍സിന്റെ ഭാഗമായാണ് പകുതി വിലയില്‍ മദ്യം നല്‍കുന്നത്.
ബിവറേജസ് കോര്‍പ്പറേഷന്‍ ഔട്ട്‌ലെറ്റുകളില്‍ മാത്രമാണ് ഇത്തരത്തില്‍ കിഴിവ് ഏര്‍പ്പെടുത്തിയിരിക്കുന്നത്. ബ്രാന്റിയുടെ വിലയിലാണ് 50 ശതമാനം കിഴിവ് ഏര്‍പ്പെടുത്തിയിരിക്കുന്നത്. ബ്ലൂ ഓഷ്യന്‍ ബിവറേജസ് എന്ന കമ്പനിയാണ് വിലക്കിഴിവില്‍ വില്‍പ്പന നടത്തുന്നത്. കമ്പനി ചില ബ്രാന്‍ഡുകളുടെ വില്‍പ്പന അവസാനിപ്പിക്കുന്നതിന്റെ ഭാഗമായാണ് വിലക്കുറവ്.
1310 രൂപയ്ക്ക് വില്‍പ്പന നടത്തിയിരുന്ന ബ്രാന്റി 650 രൂപയ്ക്കാണ് വില്‍ക്കുന്നത്. അതേസമയം, വില കുറച്ചുള്ള വില്‍പ്പന ഒരുതരത്തിലും സര്‍ക്കാരിനെയോ ബിവറേജസ് കോര്‍പ്പറേഷനേയോ ബാധിക്കില്ല. സര്‍ക്കാര്‍ നികുതിക്കോ ബെവ്‌കോയ്ക്ക് ലഭിക്കുന്ന കമ്മീഷനിലോ ഒരു കുറവും വരില്ലെന്നതാണ് സുപ്രധാനമായ മറ്റൊരു കാര്യം.
വിലയില്‍ വരുന്ന കുറവിന്റെ മുഴുവന്‍ ബാധ്യതയും കമ്പനി ഏറ്റെടുക്കും. ചില ബ്രാന്‍ഡുകള്‍ ഇനി മുതല്‍ വിപണിയില്‍ വില്‍ക്കേണ്ടതില്ലെന്ന കമ്പനി തീരുമാനം നടപ്പിലാക്കുമ്പോള്‍ അത് സര്‍ക്കാരിനോ ബിവറേജസ് കോര്‍പ്പറേഷനോ നഷ്ടം സംഭവിക്കാത്ത രീതിയിലാണ് ക്രമീകരണങ്ങള്‍ നടത്തിയിട്ടുള്ളത്.
