ഫേസ്ബുക്ക് ലൈവിലൂടെ കട കത്തിക്കുമെന്ന് ഭീഷണിപ്പെടുത്തിയ ശേഷം യുവാവ് ലോട്ടറി ഏജന്‍സിക്കടയ്ക്ക് പെട്രോളൊഴിച്ചു തീയിട്ടു. തൃപ്പൂണിത്തുറ സ്റ്റാച്യു കിഴക്കേക്കോട്ട റോഡിലെ മീനാക്ഷി ലോട്ടറീസിനാണ് യുവാവ് തീയിട്ടത്. അക്രമിയെ പൊലീസ് കസ്റ്റഡിയില്‍ എടുത്തിട്ടുണ്ട്. ഇന്നലെ വൈകിട്ട് 5.40നാണ് യുവാവ് ലോട്ടറികട ആക്രമിച്ചത്. നിരവധി ലോട്ടറികള്‍ നശിച്ച് പോയിട്ടുണ്ട്. സൈക്കിളില്‍ ലോട്ടറി വില്‍പ്പന നടത്തിവരുന്ന രാജേഷ് എന്ന ആളാണ് കടയില്‍ തീയിട്ടതെന്ന് തൃപ്പൂണിത്തുറ പൊലീസ് വ്യക്തമാക്കി.
മീനാക്ഷി ലോട്ടറി കുത്തകയാണെന്നും, ഏജന്‍സീസ് കത്തിക്കുമെന്ന് രാജേഷ് കഴിഞ്ഞദിവസം ഫെയ്സ്ബുക്ക് ലൈവില്‍ ഭീഷണിപ്പെടുത്തിയിരുന്നു. വെള്ളിയാഴ്ച വൈകിട്ട് ആറുമണിക്ക് കട കത്തിക്കുമെന്നും ഇങ്ങനെ കുത്തക മുതലാളിമാര്‍ ആവശ്യമുണ്ടോ എന്നുമായിരുന്നു ഇയാള്‍ വീഡിയോയില്‍ പറഞ്ഞിരുന്നത്.
റിയല്‍ കമ്മ്യൂണിസം, ഇ.എം.എസ്. ഭരിച്ച കമ്മ്യൂണിസമാണ് നമുക്ക് വേണ്ടത്, ജനങ്ങള്‍ക്ക് വേണ്ടി ജനങ്ങളിലേക്കിറങ്ങുന്ന സഖാക്കളെയാണ് ആവശ്യം. ഒരു കുത്തക മുതലാളിത്തം രാജേഷ് എന്ന താന്‍ ജീവിച്ചിരിക്കുവോളം സമ്മതിക്കില്ലെന്നും ഇയാള്‍ വീഡിയോയില്‍ ഭീഷണിപ്പെടുത്തിയിരുന്നു. തീപിടുത്തത്തില്‍ ഒന്നരലക്ഷത്തോളം രൂപയുടെ നഷ്ടം ഉണ്ടായതാണ് കടയുടമ വ്യക്തമാക്കി. ജീവനക്കാര്‍ ഉടന്‍ വെള്ളം ഒഴിച്ച് കൊടുത്തിയതിനാല്‍ വലിയ അപകടങ്ങള്‍ ഉണ്ടായില്ല. കടയിലെ ജീവനക്കാരുടെ ദേഹത്തും പെട്രോള്‍ വീണിരുന്നു. സംയോജിത ഉടപെടലില്‍ വന്‍ അപകടമാണ് ഒഴിവായത്.