തിരുവനന്തപുരം കോവളത്ത് എം. വിന്‍സെന്റ് എം.എല്‍.എയുടെ കാര്‍ അടിച്ചു തകര്‍ത്തു. ഇന്ന് രാവിലെയാണ് സംഭവം. വീടിന് മുന്നില്‍ നിര്‍ത്തിയിട്ട കാറാണ് അടിച്ചു തകര്‍ത്തത്. ബൈക്കില്‍ എത്തിയ യുവാവ് കമ്പിപ്പാര ഉപയോഗിച്ച് കാറിന്റെ ഗ്ലാസും, മുന്‍വശവും തകര്‍ക്കുകയായിരുന്നു.
സംഭവത്തില്‍ ബാലരാമപുരം പൊലീസ് ഒരാളെ കസ്റ്റഡിയില്‍ എടുത്തു. ഉച്ചക്കട സ്വദേശി സന്തോഷിനെയാണ് കസ്റ്റഡിയില്‍ എടുത്തത്. മുല്ലപ്പെരിയാര്‍ ഡാം പൊട്ടാന്‍ പോകുകയാണ് എന്നും എംഎല്‍എ ഒരു നടപടിയും എടുത്തില്ലെന്നും പറഞ്ഞാണ് ഇയാള്‍ കാര്‍ തകര്‍ത്തതെന്ന് പൊലീസ് അറിയിച്ചു.
യുവാവിന് മാനസിക അസ്വസ്ഥ്യം ഉള്ളയാളാണ് എന്നും പൊലീസ് പറയുന്നു. നാട്ടുകാരാണ് പ്രതിയെ പിടികൂടി പൊലീസിന് കൈമാറിയത്.