Connect with us

KERALA

മുംബൈയിലെ കര്‍ഷകര്‍ക്ക് സമരത്തിന്റെ ‘കനല്‍ ഒരു ഇത്തിരി ഇട്ട് നല്‍കിയത് കരിവള്ളൂരുകാരന്‍; വിജു കൃഷ്ണന്‍ സമരങ്ങളുടെ അമരക്കാരനായത് മാതാവിന്റെ ഒറ്റ വാക്കില്‍

, 2:24 pm

കോളെജ് അധ്യാപക ജോലി രാജിവെച്ച് മുഴുവന്‍ സമയ രാഷ്ട്രീയ പ്രവര്‍ത്തനത്തിന് ഇറങ്ങാനുറച്ച മകനോട് അമ്മ ഒറ്റ കാര്യമേ പറഞ്ഞുള്ളൂ;  ”നീ എ.കെ.ജിയെ പോലെയാകണം” ഇന്ന് ആ മകന്‍ ഇന്ത്യ കണ്ട ഐതിഹാസിക സമരങ്ങളിലൊന്നിന്റെ അമരക്കാരനാണ്. മഹാരാഷ്ട്രയില്‍ പൊള്ളുന്ന വേനലിലും തങ്ങളുടെ അവകാശങ്ങള്‍ക്കായി പോരാടി വിജയം നേടിയ കര്‍ഷകരെ മുന്നില്‍ നിന്ന് നയിച്ച വിജു കൃഷ്ണന്‍. വിണ്ടുകീറിയ പാദങ്ങളും അടിയുച്ച മനസുമായി സമരപാതകള്‍ താണ്ടിയ പാവപ്പെട്ട കര്‍ഷകന്റെ പടത്തലവനാണ് ഈ കരിവള്ളൂര്‍കാരന്‍.

കണ്ണൂരിലെ വിപ്ലവഭൂമിയായ രിന്റെ കരുത്തുമായാണ് വിജു ജെ.എന്‍.യു സര്‍വകലാശാലയില്‍ പഠിക്കാനെത്തിയത്. എസ്. എഫ്.ഐയിലൂടെ രാഷ്ട്രീയ രംഗത്ത് സജീവമായ വിജു സെന്റ് ജോസഫ് കോളെജിലെ പൊളിറ്റിക്കല്‍ സയന്‍സ് മേധാവിയായി ചുമതലയേറ്റു. തന്റെ കര്‍മ മേഖല അധ്യാപനമല്ലെന്ന് തിരിച്ചറിഞ്ഞ വിജു ജോലി ഉപേക്ഷിച്ച് കര്‍ഷകരുടെ ശബ്ദമായി മാറി. നിരവധി കര്‍ഷക മുന്നേറ്റങ്ങള്‍ക്ക് ശക്തി പകര്‍ന്ന വിജു ഇപ്പോള്‍ അഖിലേന്ത്യ കിസാന്‍ സഭയുടെ ജോയിന്റ് സെക്രട്ടറിയും സി.പി.ഐ.എം കേന്ദ്രകമ്മിറ്റിയിലെ പ്രത്യേക ക്ഷണിതാവുമാണ്.

മഹാരാഷ്ട്രയില്‍ മാത്രമല്ല, രാജസ്ഥാനിലും കര്‍ണാടകയിലും മധ്യപ്രദേശിലുമെല്ലാം നിരവധി അവകാശ പോരാട്ടങ്ങളുടെ മുന്‍നിര പോരാളിയായിരുന്നു വിജു. 2009 മുതല്‍ കര്‍ഷക പോരാട്ടങ്ങളുടെ മുന്‍നിരക്കാരനായ അദ്ദേഹം 2016 ഓഗസ്റ്റ് 15ന് നടന്ന ചരിത്ര സമരത്തില്‍ ജിഗ്നേഷ് മേവാനിക്കൊപ്പം സമരക്കാരെ അഭിസംബോധന ചെയ്തു സംസാരിച്ചിരുന്നു. 2016 നവംബറില്‍ തമിഴ്‌നാട് വിരുദനഗറില്‍ ആരംഭിച്ച കിസാന്‍ സഭയുടെ കിസാന്‍ സംഘര്‍ഷ് ജാഥയുടെ അമരത്തും വിജു കൃഷ്ണന്‍ ഉണ്ടായിരുന്നു.

മഹാരാഷ്ട്രയിലെ വര്‍ഗസമരവിജയം അവകാശങ്ങള്‍ നിഷേധിക്കപ്പെട്ടവര്‍ക്ക് കരുത്ത് പകരുന്ന ഒന്നാണ്. ആത്മഹത്യയല്ല, സമരമാണ് മാര്‍ഗമെന്ന മുദ്രാവാക്യവുമായാണ് ഓരോ കര്‍ഷകപോരാളിയും സമരമുഖത്തേക്കെത്തിയത്. ഭരണകൂടത്തിന്റെ ചൂഷണങ്ങള്‍ക്കും അടിച്ചമര്‍ത്തലുകള്‍ക്കുമെതിരെ ബിജുവും കൂട്ടരും ഉറച്ച ശബ്ദമായി. ഓരോ കനലിനും അഗ്നിയായി ആളിപ്പടരാനാവുമെന്ന് തെളിയിക്കുകയാണ് മഹാരാഷ്ട്രയിലെ സമരവിജയം.