കോട്ടയത്ത് ചെക്ക് ഡാം തുറക്കാന്‍ ശ്രമിക്കുന്നതിനിടെ മധ്യവയസ്‌കന്‍ മുങ്ങിമരിച്ചു. പലകകള്‍ക്കിടെയില്‍ കൈ കുടുങ്ങിയാണ് കരൂര്‍ സ്വദേശി ഉറുമ്പില്‍ രാജുവിന് ജീവന്‍ നഷ്ടപ്പെട്ടത്. ഇന്ന് ഉച്ചയ്ക്ക് ഒരു മണിയോടെയാണ് സംഭവം നടന്നത്. പാലാ പയപ്പാര്‍ അമ്പലത്തിന് സമീപം കവറുമുണ്ടയിലെ ചെക്ക് ഡാം തുറക്കുന്നതിനിടെയായിരുന്നു അപകടം.
ഡാം തുറക്കുന്നതിനായി പലകകള്‍ക്കിടയില്‍ കയര്‍ കുരുക്കാനുള്ള ശ്രമത്തിനിടെയാണ് രാജുവിന്റെ കൈ കുടുങ്ങിപ്പോയത്. കൈകള്‍ കുടുങ്ങിയതിനാല്‍ രാജുവിന് പുറത്തുവരാന്‍ കഴിഞ്ഞില്ല. ഇതോടെ രാജു വെള്ളത്തില്‍ മുങ്ങി പോകുകയായിരുന്നു. സംഭവം കണ്ടുനിന്ന നാട്ടുകാര്‍ രാജുവിനെ രക്ഷപ്പെടുത്താന്‍ ശ്രമിച്ചെങ്കിലും സാധിച്ചില്ല.
തുടര്‍ന്ന് നാട്ടുകാര്‍ വിവരം അറിയിച്ചതിനെ തുടര്‍ന്ന് സ്ഥലത്തെത്തിയ അഗ്നിശമന സേനയും പൊലീസും നാട്ടുകാരും ചേര്‍ന്ന് പുറത്തെടുത്ത രാജുവിനെ ജനറല്‍ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.