ഉറങ്ങുന്നതിനു മുമ്പുള്ള ഏകപ്രാര്ത്ഥന കോഴിക്കോട് കോര്പ്പറേഷന്റെ കുടിവെള്ള പൈപ്പ് പൊട്ടരുതേയെന്നാണെന്ന് എം.ടി വാസുദേവന് നായര്. കോഴിക്കോട് നഗരത്തില് അടിക്കടി കുടിവെള്ളം മുടങ്ങുകയാണെന്നായിരുന്നു എം.ടിയുടെ പരാതി. ഊരാളുങ്കല് സൊസൈറ്റിയെ കുറിച്ച് തോമസ് ഐസക് എഴുതിയ ജനകീയ ബദലുകളുടെ നിര്മ്മിതി എന്ന പുസ്തകത്തിന്റെ പ്രകാശന ചടങ്ങായിരുന്നു വേദി. ധനമന്ത്രി തോമസ് ഐസക്, എം.എല്.എ, എ. പ്രദീപ് കുമാര്, മേയര് തോട്ടത്തില് രവീന്ദ്രന് എന്നിവരുള്പ്പെടെ വേദിയിലിരിക്കെയായിരുന്നു എം.ടിയുടെ പരാമര്ശം.
Read more
ഉറങ്ങും മുമ്പ് ഗുരുവായൂരപ്പനെ പ്രാര്ത്ഥിക്കുന്നതിന് പകരം ഇപ്പോള് മറ്റൊരു കാര്യമാണ്. കോര്പ്പറേഷന്റെ കുടിവെള്ള പൈപ്പ് പൊട്ടരുതേ എന്നാണ് പ്രാര്ത്ഥിക്കാറ്. 20 ദിവസത്തിലേറെ വെള്ളം കിട്ടാതിരുന്നിട്ടുണ്ടെന്നും എം.ടി വിമര്ശിച്ചു. സാമ്പത്തിക പ്രയാസമുണ്ടെന്നും കിഫ്ബി വഴി ധനമന്ത്രി പണം അനുവദിക്കുമെന്നാണ് പ്രതീക്ഷയെന്നുമായിരുന്നു കോഴിക്കോട് മേയര് തോട്ടത്തില് രവീന്ദ്രന്റെ മറുപടി. എം.ടിയെ പോലൊരാള് ഇത്തരമൊരു കാര്യം ചൂണ്ടിക്കാണിക്കുമ്പോള് ഗൗരവമായി തന്നെ ഇടപെടുമെന്നായിരുന്നു തോമസ് ഐസക്കിന്റെ പ്രതികരണം.