പുതുപ്പള്ളിയിലെ ഉപതിരഞ്ഞെടുപ്പില്‍ എല്‍ഡിഎഫ് ജയിക്കുമെന്ന് സിപിഎം സംസ്ഥാന സെക്രട്ടറി എംവി ഗോവിന്ദന്‍. പുതുപ്പള്ളിയിലെ രാഷ്ട്രീയം മാറിയെന്ന പറഞ്ഞ സിപിഎം സംസ്ഥാന സെക്രട്ടറി 53 വര്‍ഷക്കാലത്തിന്റെ ചരിത്രമുള്ള മണ്ഡലത്തില്‍ കോണ്‍ഗ്രസിന്റെ വിജയം അവസാനിപ്പിക്കാനാകുമെന്നും ആത്മവിശ്വാസം പ്രകടിപ്പിച്ചു. ഉപതെരഞ്ഞെടുപ്പുമായി ബന്ധപ്പെട്ട് പുറത്തുവന്ന സര്‍വ്വേകളെല്ലാം കള്ളപ്രചാര വേലയെന്നും എംവി ഗോവിന്ദന്‍ പറഞ്ഞു.
കോണ്‍ഗ്രസിന്റെ വിജയം പ്രഖ്യാപിച്ചു വന്ന മാധ്യമ സര്‍വ്വേകളെയാണ് എം വി ഗോവിന്ദന്‍ തള്ളിയത്. നൂറുപേരെ കണ്ട് ചോദിച്ചാല്‍ പുതുപ്പള്ളിയിലെ പൊതുവികാരം മനസ്സിലാക്കാന്‍ സാധിക്കുമോ എന്നും സിപിഎം സംസ്ഥാന സെക്രട്ടറി ചോദിച്ചു.
ഈസി വാക്കോവറായി പുതുപ്പള്ളി ജയിക്കാനാകുമെന്ന തരത്തിലായിരുന്നു യുഡിഎഫിന്റെ ആദ്യത്തെ പ്രതികരണം. സ്ഥാനാര്‍ഥിയെ തന്നെ നിര്‍ത്തേണ്ടതായിട്ടുണ്ടോ എന്നും സ്ഥാനാര്‍ഥി ആരായിരിക്കും എന്നും മുന്‍കൂട്ടി തന്നെ കോണ്‍ഗ്രസ് നേതാക്കള്‍ പരസ്യമായി പറയുന്ന നില ഉണ്ടായിരുന്നുവെന്നും ചൂണ്ടിക്കാണിച്ച എംവി ഗോവിന്ദന്‍ ഇടതുമുന്നണിയുടെ നിലപാടിനെ കുറിച്ചും ഓര്‍മ്മിപ്പിച്ചു.
ആദ്യഘട്ടത്തില്‍ പുതുപ്പള്ളിയില്‍ വൈകാരികമായ തലം രൂപപ്പെട്ടു വരുന്നു എന്ന് കണ്ടാണ് കോണ്‍ഗ്രസ് നേതൃത്വം അത്തരം നിലപാട് സ്വീകരിച്ചത്. എന്നാല്‍ പുതുപ്പള്ളിയില്‍ രാഷ്ട്രീയ നിലപാടുകള്‍ വെച്ച് മത്സരിക്കുമെന്നായിരുന്നു ഇടതുമുന്നണി തുടക്കം മുതല്‍ എടുത്ത നിലപാടെന്നും രാഷ്ട്രീയവും വികസനവും ഫലപ്രമായി പുതുപ്പള്ളിയില്‍ ഇടതുപക്ഷം ചര്‍ച്ച ചെയ്തുവെന്നും എംവി ഗോവിന്ദന്‍ പറഞ്ഞു.
പുതുപ്പള്ളിയിലെ വോട്ടര്‍മാരെ ഫലപ്രദമായി പരിശോധിച്ച് നേരിട്ട് വോട്ടര്‍മാരെ കണ്ട് പ്രചാരണം നടത്തുകയാണ്. ഞങ്ങള്‍ ഈ മണ്ഡലം ജയിക്കും. അതിനാവശ്യമായ വോട്ടുകള്‍ ജനങ്ങള്‍ ഇടതുമുന്നണിക്ക് നല്‍കും.
ഹിന്ദുത്വ അജണ്ടവെച്ച് പ്രവര്‍ത്തിക്കുന്ന ബിജെപിയെക്കുറിച്ച് ഉപതിരഞ്ഞെടുപ്പ് പ്രചാരണത്തില്‍ എവിടെയും കോണ്‍ഗ്രസ് ഒരക്ഷരം മിണ്ടുന്നില്ലെന്നും കുറ്റപ്പെടുത്താനും സിപിഎം സംസ്ഥാന സെക്രട്ടറി മറന്നില്ല. മാറിയ രാഷ്ട്രീയത്തില്‍ പുതുപ്പള്ളിയില്‍ ഇടതുപക്ഷം തന്നെ ജയിക്കുമെന്ന് ആവര്‍ത്തിക്കുകയാണ് എംവി ഗോവിന്ദന്‍.