തലസ്ഥാനത്ത് നൈറ്റ് ലൈഫിന് തുറന്ന് കൊടുത്ത മാനവീയം വീഥി ഫൈറ്റ് ലൈഫിന് വേദിയാകുന്നു. നൈറ്റ് ലൈഫ് ആഘോഷിക്കാനെത്തുന്ന യുവാക്കള്‍ തമ്മില്‍ തല്ലുന്നത് മാനവീയം വീഥിയില്‍ പതിവ് കാഴ്ചയാകുന്നു. ഒടുവില്‍ പുറത്ത് വന്നത് ഇന്ന് പുലര്‍ച്ചെ നടന്ന കൂട്ടയടിയുടെ ദൃശ്യങ്ങളാണ്. യുവാവിനെ നിലത്തിട്ട് മര്‍ദ്ദിക്കുമ്പോള്‍ എതിര്‍സംഘം നൃത്തം ചെയ്ത് ആഘോഷിക്കുന്ന ദൃശ്യങ്ങളാണ് സാമൂഹ്യ മാധ്യമങ്ങളില്‍ വൈറലാകുന്നത്.
ഇന്ന് പുലര്‍ച്ചെ രണ്ട് മണിയോടെ ആയിരുന്നു യുവാക്കള്‍ തമ്മില്‍ ഏറ്റുമുട്ടിയത്. നൃത്തം ചെയ്യുന്നതിനെ ചൊല്ലിയുള്ള തര്‍ക്കമാണ് സംഘര്‍ഷത്തില്‍ കലാശിച്ചതെന്നാണ് വിവരം. എന്നാല്‍ സംഭവത്തില്‍ ഇതുവരെ പരാതിയൊന്നും ലഭിച്ചിട്ടില്ലെന്ന് പൊലീസ് അറിയിച്ചു. മാനവീയം വീഥിയില്‍ സംഘര്‍ഷങ്ങള്‍ നിത്യ സംഭവമാണ്. തല്ലിയവരെയും മര്‍ദ്ദനമേറ്റവരും ആരാണെന്ന് ഇതുവരെ വ്യക്തമായിട്ടില്ല.
അതേ സമയം സ്‌പെഷ്യല്‍ ബ്രാഞ്ച് റിപ്പോര്‍ട്ട് അനുസരിച്ച് പൂന്തുറയില്‍ നിന്നുള്ള മൂന്ന് യുവാക്കള്‍ക്കാണ് മര്‍ദ്ദനമേറ്റത്. മ്യൂസിയം പൊലീസ് സംഭവത്തില്‍ സ്വമേധയാ കേസെടുത്ത് അന്വേഷണം ആരംഭിച്ചു. മര്‍ദ്ദനമേറ്റതില്‍ ഒരു യുവാവ് ജനറല്‍ ആശുപത്രിയില്‍ ചികിത്സ തേടിയിട്ടുണ്ടെന്നാണ് വിവരം. എന്നാല്‍ ഇവിടെ നിരന്തരം സംഘര്‍ഷങ്ങള്‍ പതിവാണെന്ന് ആക്ഷേപമുണ്ട്.
ഒന്നരമാസം മുന്‍പാണ് മാനവീയം വീഥി നൈറ്റ് ലൈഫിനായി തുറന്ന് കൊടുത്തത്. ഇതിനിടെ ഒന്‍പത് തവണ ഇവിടെ സംഘര്‍ഷങ്ങള്‍ നടന്നതായാണ് റിപ്പോര്‍ട്ട്. പലപ്പോഴും ലഹരി മാഫിയകളും മദ്യപസംഘങ്ങളുമാണ് ഇവിടെ ഏറ്റുമുട്ടാറുള്ളത്. എന്നാല്‍ ഇത്തരം സംഭവങ്ങളില്‍ ഇടപെടുന്നതില്‍ സാങ്കേതിക തടസങ്ങളുണ്ടെന്നാണ് പൊലീസിന്റെ വാദം. മാനവീയം വീഥിയിലേക്ക് പൊലീസ് കടന്നുചെല്ലുന്നത് സദാചാര പൊലീസിങായി കണക്കാക്കാന്‍ ഇടയുണ്ടെന്ന നിലപാടിലാണ് പൊലീസ്.