എഡിഎം നവീന്‍ ബാബുവിന്റെ ആത്മഹത്യ കേസില്‍ പിപി ദിവ്യയ്ക്ക് സംരക്ഷണം തുടര്‍ന്ന് പൊലീസ്. മുന്‍കൂര്‍ ജാമ്യഹര്‍ജിയില്‍ ഉത്തരവ് വരും വരെ അറസ്റ്റ് ഉണ്ടാവില്ല. തലശ്ശേരി പ്രിന്‍സിപ്പല്‍ സെഷന്‍സ് കോടതി ചൊവ്വാഴ്ചയാണ് ഉത്തരവ് പറയുക.
മുന്‍കൂര്‍ ജാമ്യത്തില്‍ തീരുമാനം വരും വരെ അന്വേഷണ സംഘത്തിന് മുന്നില്‍ ഹാജറാകില്ലെന്ന് ദിവ്യയോട് അടുത്ത വൃത്തങ്ങളും വ്യക്തമാക്കിയിരുന്നു. കളക്ടര്‍ മുതല്‍ ജില്ലാ പഞ്ചായത്ത് ഓഫീസ് ജീവനക്കാര്‍ വരെയുള്ളവരുടെ മൊഴി പൊലീസ് എടുത്തിട്ടുണ്ട്.
എന്നാല്‍ കേസില്‍ ഏറ്റവും നിര്‍ണായകമായ, ജില്ലാ പഞ്ചായത്ത് മുന്‍ അധ്യക്ഷയുടെ മൊഴി രേഖപ്പെടുത്താനോ ചോദ്യം ചെയ്യാന്‍, പ്രതി ചേര്‍ത്ത് പതിനൊന്നാം ദിവസവും പൊലീസ് തയ്യാറായിട്ടില്ല. ആരോഗ്യപ്രശ്‌നങ്ങളെ തുടര്‍ന്ന് ഇന്നലെ ദിവ്യ ചികിത്സ തേടിയെന്ന് വിവരമുണ്ട്.
അതേസമയം, ചൊവ്വാഴ്ചയിലെ തീരുമാനം വന്ന ശേഷം കണ്ണൂര്‍ ജില്ലാ കമ്മിറ്റി ദിവ്യക്കെതിരെ സംഘടന നടപടിയിലേക്ക് കടന്നേക്കും. നിയമപരമായി തന്നെ കാര്യങ്ങള്‍ മുന്നോട്ട് പോകട്ടെ എന്നാണ് വിഷയത്തില്‍ സെക്രട്ടറിയേറ്റിന്റെ വിലയിരുത്തല്‍.
