ഓൺലൈൻ പണം തട്ടിപ്പിന്റെ വാർത്തകൾ നിരന്തരം പുറത്തുവരുന്നുണ്ട്. അവയിൽ പലതും സംഭവിക്കുന്നത് ബാങ്ക് കോളുകളുടെ രൂപത്തിലാണ്. ആലപ്പുഴയിൽ ഓൺലൈനിലൂടെയുള്ള പണം തട്ടിപ്പിൽ വയോധികന് നഷ്ടമായത് വൻതുകയാണ്. ഹരിപ്പാട് പിലാപ്പുഴ പള്ളിയുടെ വടക്കത്തിൽ മുഹമ്മദ് സാലി (70 ) യുടെ പണമാണ് നഷ്ടപ്പെട്ടത്. 43,000 രൂപയാണ് ഇയാളിൽ നിന്ന് തട്ടിപ്പുകാർ കൈക്കലാക്കിയത്.
പണം നഷ്ടപ്പെട്ടതിനെ തുടർന്ന് മുഹമ്മദ് സാലി ഹരിപ്പാട് പൊലീസിൽ പരാതി നൽകി. സംഭവത്തിൽ പൊലീസ് കേസെടുത്തു അന്വേഷണം ആരംഭിച്ചിട്ടുണ്ട്. പൊലീസ് പറയുന്നത് പ്രകാരം മുഹമ്മദ് സാലിയുടെ ഫോണിലേക്ക് ബാങ്കിൽ നിന്നാണെന്ന് പറഞ്ഞുകൊണ്ട് ഒരു കോൾ വന്നതിലൂടെയാണ് തട്ടിപ്പിന്റെ തുടക്കം.
അക്കൗണ്ടിന്റെ കെവൈസി ബ്ലോക്ക് ആണെന്നും ഇത്‌ ഒഴിവാക്കുന്നതിനായുള്ള ലിങ്ക് മൊബൈൽ അയച്ചിട്ടുണ്ടെന്നും ഫോൺ ചെയ്ത അജ്ഞാതൻ അറിയിച്ചു. ഇതനുസരിച്ച് മുഹമ്മദ് സാലി ലിങ്ക് ഓപ്പൺ ആക്കുകയും കെ വൈ സി പുതുക്കുന്നതിനായി അതിലേക്ക് വന്ന ഒടിപി നമ്പർ പറഞ്ഞു കൊടുക്കുകയും ചെയ്തു.
അതേ സമയം തന്നെ സാലിയുടെ എസ് ബി ഐ ബാങ്ക് അക്കൗണ്ടിൽ നിന്നും 42999 രൂപ പിന്‍വലിച്ചതായുള്ള സന്ദേശം ലഭിക്കുകയായിരുന്നു. ഇതോടെയാണ് സംഭവം തട്ടിപ്പാണെന്ന് വ്യക്തമായത്. ഇതോടെ സാലി പരാതിയുമായി പൊലീസിസെ സമീപിക്കുകയായിരുന്നു.