ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധിയും എ.ഐ.സി.സി ജനറല്‍ സെക്രട്ടറി പ്രിയങ്ക ഗാന്ധിയും ഇന്ന് വയനാട്ടിലെത്തും. ദുരിതാശ്വാസ ക്യാമ്പുകളും ചികിത്സയിലുള്ളവരെയും ഇരുവരും സന്ദര്‍ശിക്കും. കഴിഞ്ഞ ദിവസം വരാനിരുന്നെങ്കിലും പ്രതികൂല കാലാവസ്ഥയെ തുടര്‍ന്ന് അനുമതി കിട്ടിയിരുന്നില്ല. തുടര്‍ന്നാണ് സന്ദര്‍ശനം ഇന്നത്തേക്ക് മാറ്റിയത്.
മേപ്പാടിയിലെ സ്‌കൂളുകളിലുള്ള ദുരിതാശ്വാസ ക്യാമ്പുകളിലും പരിക്കേറ്റവരെ ചികിത്സിക്കുന്ന വിംസ് ആശുപത്രിയിലും രാഹുലും പ്രിയങ്കയുമെത്തും. രാവിലെ ഡല്‍ഹിയില്‍നിന്ന് മൈസുരുവിലേക്ക് വിമാനത്തിലേക്കും തുടര്‍ന്ന് റോഡ് മാര്‍ഗവുമാകും ഇരുവരും എത്തുകയെന്നാണ് സൂചന.
നേരത്തെ വയനാട്ടില്‍നിന്ന് എം.പിയായി തെരഞ്ഞെടുക്കപ്പെട്ട രാഹുല്‍, റായ്ബറേലി നിലനിര്‍ത്തി രാജിവെച്ചിരുന്നു. സഹോദരി പ്രിയങ്കയെ ഉപതെരഞ്ഞെടുപ്പില്‍ സ്ഥാനാര്‍ഥിയാക്കുമെന്ന് കോണ്‍ഗ്രസ് പ്രഖ്യാപിച്ചിരുന്നു