പാലക്കാട് ചിറ്റൂരില്‍ വന്‍ കുഴല്‍പ്പണ വേട്ട. മലപ്പുറം സ്വദേശികളായ രണ്ട് യുവാക്കളാണ് കോടികളുടെ കുഴല്‍പ്പണവുമായി ചിറ്റൂര്‍ പൊലീസിന്റെ പിടിയിലായത്. അങ്ങാടിപ്പുറം സ്വദേശികളായ ജംഷാദ്, അബ്ദുല്ല എന്നിവരില്‍ നിന്ന് മൂന്ന് കോടിയോളം രൂപയുടെ കുഴല്‍പ്പണമാണ് പൊലീസ് പിടിച്ചെടുത്തത്. ഇന്ന് പുലര്‍ച്ചെ ആയിരുന്നു കേസിന് ആസ്പദമായ സംഭവം നടന്നത്.
തമിഴ്‌നാട്ടില്‍ നിന്നും മലപ്പുറത്തേക്ക് കടത്തുകയായിരുന്ന കുഴല്‍പ്പണം കാറിന്റെ രഹസ്യ അറയില്‍ ഒളിപ്പിച്ച നിലയിലായിരുന്നു. പൊലീസിന് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ പുലര്‍ച്ചെ നടത്തിയ വാഹന പരിശോധനയിലാണ് പ്രതികള്‍ പിടിയിലായത്. തമിഴ്‌നാട്ടില്‍ നിന്നെത്തിയ യുവാക്കള്‍ പണവുമായി പാലക്കാട് വഴി മലപ്പുറത്തേക്ക് പോകുമ്പോഴായിരുന്നു പൊലീസ് പിടികൂടിയത്.
രണ്ടുകോടി 97 ലക്ഷത്തി അമ്പതിനായിരം രൂപയാണ് പൊലീസ് പ്രതികളില്‍ നിന്ന് കണ്ടെടുത്തത്. തമിഴ്നാട്ടിലെ തിരുപ്പൂരില്‍ നിന്ന് മലപ്പുറത്തേക്ക് പണം കടത്താനായിരുന്നു യുവാക്കളുടെ ശ്രമം. 100, 200, 500 രൂപയുടെ നോട്ടുകെട്ടുകളാണ് പ്രതിയില്‍ നിന്നും പിടിച്ചെടുത്തത്. പ്രതികളെ അറസ്റ്റ് രേഖപ്പെടുത്തിയ ശേഷം വൈകുന്നേരം കോടതിയില്‍ ഹാജരാക്കും.