സ്‌കൂള്‍ കലോത്സവങ്ങളിലെയും കായിക, ശാസ്ത്രമേളകളിലെയും ഊട്ടുപുരകളിലേക്ക് ഇനിയില്ലെന്ന തീരുമാനത്തില്‍ മാറ്റമില്ലെന്ന് വ്യക്തമാക്കി പാചകവിദഗ്ധന്‍ പഴയിടം മോഹനന്‍ നമ്പൂതിരി. ജനുവരിയില്‍ കോഴിക്കോട്ടെ സംസ്ഥാന കലോത്സവത്തിന്റെ അടുക്കളയില്‍ നിന്ന് യാത്ര പറഞ്ഞിറങ്ങിയതാണ്. ഇനി സ്‌കൂള്‍ മേളകളുടെ ഊട്ടുപുരയില്‍ ഉണ്ടാകില്ലന്നും അദേഹം വ്യക്തമാക്കി.
മാധ്യമപ്രവര്‍ത്തകനായ അരുണ്‍ കുമാര്‍ ഉയര്‍ത്തിയ വിവാദങ്ങളും അതിനോടുള്ള പ്രതികരണങ്ങളും ചര്‍ച്ചകളും മനസ്സില്‍ ആഴത്തിലുള്ള മുറിവേല്‍പിച്ചെങ്കിലും അതെല്ലാം ഉണങ്ങി. വിവാദങ്ങള്‍ക്കു തുടക്കമിട്ട് ഫെയ്‌സ്ബുക് പോസ്റ്റിട്ട വ്യക്തി നേരിട്ടെത്തിയെന്നു അദേഹം വ്യക്തമാക്കി. പാചകച്ചുമതല മറ്റുള്ളവര്‍ക്ക് ഏറ്റെടുക്കാന്‍ അവസരം നല്‍കാന്‍ വേണ്ടിക്കൂടിയുമാണ് ഈ പിന്മാറ്റമെന്ന് അദേഹം പറഞ്ഞു.
ഒട്ടേറെപ്പേര്‍ കൂടെ നിന്നു. പഴയിടം ഓര്‍മിക്കുന്നു. ഇത്തവണയും വിവിധ കലോത്സവ കമ്മിറ്റിക്കാരും സംഘാടകരും വിളിക്കുന്നുണ്ട്. ഒന്നിനും ടെന്‍ഡര്‍ സമര്‍പ്പിച്ചിട്ടില്ല. സദ്യയൊരുക്കലും വിദേശങ്ങളിലേക്ക് ഉള്‍പ്പെടെ വിഭവങ്ങള്‍ അയയ്ക്കലുമൊക്കെയായി തിരക്കാണ്. വീട്ടില്‍ മക്കളും കൊച്ചുമക്കളും കൂടെയുള്ളതിന്റെ സന്തോഷം. ഇതൊക്കെ മതി തല്‍ക്കാലമെന്ന് ഒരു മാധ്യമത്തിന് നല്‍കിയ അഭിമുഖത്തില്‍ പഴയിടം പറഞ്ഞു.
2000ല്‍ കോട്ടയത്തെ റവന്യു ജില്ലാ കലോത്സവത്തിലാണ് ആദ്യമായി പാചകച്ചുമതല ഏറ്റെടുക്കുന്നത്. അന്നു മുതല്‍ ഈ വര്‍ഷം ജനുവരിയില്‍ കോഴിക്കോട്ട് നടന്ന സംസ്ഥാന കലോത്സവം വരെയുള്ള സ്‌കൂള്‍ മേളകളില്‍ രണ്ടേകാല്‍ കോടി കുട്ടികള്‍ക്കു ഭക്ഷണം വിളമ്പിയെന്ന് പഴയിടം പറയുന്നു.