കാസര്‍കോട് ഉളിയത്തടുക്കയില്‍ പെട്രോള് പമ്പ് അടിച്ചു തകര്‍ത്ത് അക്രമി സംഘം. പെട്രോള് കടം ചോദിച്ചിട്ട് നല്‍കാത്തതിലുള്ള പ്രകോപനമാണ് അക്രമത്തില്‍ കലാശിച്ചത്. സംഭവത്തില്‍ മൂന്ന് പേരെ പൊലീസ് കസ്റ്റഡിയില്‍ എടുത്തു.
മധൂര്‍ റോഡിലുള്ള എ.കെ. സണ്‍സ് പമ്പിലാണ് സംഭവമുണ്ടായത്. ഉളിയത്തടുക്ക സ്വദേശിയായ അഷ്ഫാഖ് ബൈക്കുമായി പെട്രോള് അടിക്കാന്‍ എത്തിയിരുന്നു. അമ്പത് രൂപയ്ക്ക് പെട്രോള് കടം ചോദിച്ചപ്പോള്‍ നല്‍കാന്‍ ജിവനക്കാര്‍ തയ്യാറായിരുന്നില്ല. ഇതിന്റെ പ്രതികാരമായി സുഹൃത്തുക്കളോടൊപ്പം തിരികെ പമ്പില്‍ എത്തി അക്രമം നടത്തുകയായിരുന്നു.
ജീവനക്കാരുമായി വക്കേറ്റം ഉണ്ടാവുകയും, തുടര്‍ന്ന് പമ്പിലെ ഓയില്‍ റൂമും, ഓഫിസ് റൂമും, ജ്യൂസ് സെന്ററും അടിച്ചു തകര്‍ക്കുകയായിരുന്നു. ആക്രമണത്തില്‍ ജീവനക്കാര്‍ക്ക് പരിക്കേറ്റിട്ടുണ്ട്.
ആക്രമണത്തില്‍ പങ്കാളികളായ കൂടുതല്‍ പേര്‍ക്കായി പൊലീസ് തിരച്ചില്‍ ആരംഭിച്ചിട്ടുണ്ട്. മുഖ്യപ്രതിയായ അഷ്ഫാഖിന് വേണ്ടിയുള്ള തിരച്ചില്‍ തുടരുകയാണ്.