പൊലീസ് സ്റ്റേഷനിൽ വിളിച്ചുവരുത്തി 14 കാരനെ മർദ്ദിച്ച സംഭവത്തിൽ കേസെടുത്ത് ബാലാവകാശ കമ്മീഷൻ. സംഭവത്തിൽ അടിയന്തരമായി റിപ്പോർട്ട് നൽകാൻ ബാലാവകാശ കമ്മീഷൻ ജില്ലാ പൊലീസ് മേധാവിക്ക് നിർദേശം നൽകി. മണ്ണഞ്ചേരി പൊലീസ് സ്റ്റേഷനിലായിരുന്നു സംഭവം.
അതിഥി തൊഴിലാളിയുടെ പത്താം ക്ലാസുകാരനായ മകനെ വിളിച്ചുവരുത്തി മർദ്ദിച്ചു എന്നായിരുന്നു പരാതി.വാഹനാപകടവുമായി ബന്ധപ്പെട്ടായിരുന്നു പതിനാലുകാരനെ സ്റ്റേഷനിൽ വിളിച്ചു വരുത്തിയത്. കുട്ടിയുടെ മുതുകിൽ ചവിട്ടി എന്നും ചൂരൽ കൊണ്ട് കൈയിൽ അടിച്ചുവെന്നും പരായിയിൽ പറയുന്നു.
മാതാപിതാക്കളെ കാണിക്കാതെ കുട്ടിയെ ആറുമണിക്കൂർ കസ്റ്റഡിയിൽ വച്ചു എന്നും പരാതിയിൽ ചൂണ്ടിക്കാണിച്ചിട്ടുണ്ട്. ശിശു സംരക്ഷണ സമിതിയാണ് ബാലാവകാശ കമ്മീഷന് പരാതി കൈമാറിയത്. പരാതിയിൽ കേസെടുത്തുവെന്ന് ബാലാവകാശ കമ്മീഷൻ അംഗം ജലജ ചന്ദ്രൻ പറഞ്ഞു.
