വോട്ടെടുപ്പിന് മണിക്കൂറുകള്‍ മാത്രം ശേഷിക്കേ തൃപ്പൂണിത്തറയില്‍ ബിജെപിക്ക് വോട്ട് ചെയ്യരുതെന്ന് ആവശ്യപ്പെട്ട് ശബരിമല കര്‍മ്മസമിതിയുടെ പേരില്‍ പോസ്റ്ററുകള്‍. ‘ ബിജെപിക്ക് വോട്ട് ചെയ്ത് ഇടതിനെ ജയിപ്പിക്കരുത്’ എന്നാണ് പോസ്റ്ററുകളില്‍ എഴുതിയിരിക്കുന്നത്. മണ്ഡലത്തിലെ ബിജെപി സ്ഥാനാര്‍ത്ഥി ഡോ കെഎസ് രാധാകൃഷ്ണന്റെ പോസ്റ്ററുകള്‍ക്ക് മുകളിലും ഈ പോസ്റ്റര്‍ പതിച്ചിട്ടുണ്ട്.
എന്നാല്‍ തങ്ങളല്ല ഈ പോസ്റ്ററുകള്‍ പതിച്ചതെന്നാണ് ശബരിമല കര്‍മ്മ സമിതി നേതാക്കള്‍ പറയുന്നത്. വോട്ട് മറിക്കാനുള്ള യുഡിഎഫിന്റെ അടവാണിതെന്ന് ബിജെപിയും ആരോപിച്ചു. പോസ്റ്ററിന്റെ ഗുണഭോക്താവ് കെ.ബാബുവാണെന്നും ബാബുവിനെതിരേ പരാതി നല്‍കുമെന്നും ബിജെപി സ്ഥാനാര്‍ത്ഥി ഡോ. കെ.എസ്.രാധാകൃഷ്ണന്‍ പറഞ്ഞു.
“പോസ്റ്ററിന്റെ ഗുണഭോക്താവ് യുഡിഎഫ് സ്ഥാനാര്‍ത്ഥി കെ.ബാബുവാണ്. ഒന്നുകില്‍ അതിന്റെ ഉത്തരവാദിത്വം ബാബു നിഷേധിക്കണം. അല്ലെങ്കില്‍ അദ്ദേഹത്തിനെതിരേ കേസെടുക്കേണ്ടി വരും. ഈ ഒരു നിലയിലേക്ക് താഴരുത്. പരാജയഭീതി ബാബുവിനെ ഗ്രസിച്ചിരിക്കുന്നു “-രാധാകൃഷ്ണന്‍ പറഞ്ഞു.
ഇടതുമുന്നണി സ്ഥാനാര്‍ത്ഥി എം സ്വരാജും യുഡിഎഫ് സ്ഥാനാര്‍ത്ഥി കെ ബാബുവും തമ്മില്‍ ശക്തമായ പോരാട്ടം നടക്കുന്ന തൃപ്പൂണിത്തറയില്‍ ബിജെപി വോട്ടുകള്‍ സ്വന്തമാക്കാനുള്ള യുഎഡിഎഫ് ശ്രമമാണിതെന്ന് ബിജെപി ആരോപിക്കുന്നു.
പോസ്റ്ററുകള്‍ ക്ഷേത്രപരിസരത്തിന് പുറമേ വീടുകളിലും എത്തിച്ചിട്ടുളളതായി ബി.ജെ.പി. ആരോപിക്കുന്നു. ഇതിനെതിരേ ശക്തമായി പ്രതികരിക്കുമെന്ന് കര്‍മ്മസമിതിയും വ്യക്തമാക്കിയിട്ടുണ്ട്. ശബരിമല യുവതീപ്രവേശവുമായി ബന്ധപ്പെട്ടുളള പ്രതിഷേധങ്ങളും നാമജപ ഘോഷയാത്രയും നടത്തിയത് കര്‍മ്മസമിതിയുടെ നേതൃത്വത്തിലായിരുന്നു. ബി.ജെ.പിക്ക് അനുകൂലമായ നിലപാടാണ് കര്‍മ്മസമിതിയുടേത്. കര്‍മ്മസമിതിയുടെ ചുമതലക്കാരില്‍ ഒരാളാണ് കെ.എസ് രാധാകൃഷ്ണനും.