2024 ലോക്സഭാ തിരഞ്ഞെടുപ്പ് പ്രചാരണത്തിനായി പ്രധാനമന്ത്രി നരേന്ദ്രമോദി വീണ്ടും കേരളത്തിലേക്ക്. ഈ മാസം 15ന് കേരളത്തിലെത്തുന്ന പ്രധാനമന്ത്രി ആറ്റിങ്ങലും കുന്നംകുളത്തും എൻഡിഎയുടെ പൊതുപരിപാടികളിൽ പങ്കെടുക്കും. രണ്ട് മണ്ഡലങ്ങളിലും പൊതുസമ്മേളനം നടത്താനാണ് പാർട്ടിയുടെ തീരുമാനം.
പ്രധാനമന്ത്രിയുടെ സന്ദർശനം സംബന്ധിച്ച് നേതൃത്വത്തിന് ഔദ്യോഗിക വിവരം ലഭിച്ചു. ഇത് പ്രകാരം കോഴിക്കോടും പരിപാടി സംഘടിപ്പിക്കാൻ ബിജെപി ലക്ഷ്യം വയ്ക്കുന്നുണ്ട്. ത്രികോണ മത്സരം നടക്കാനിരിക്കുന്ന തൃശൂർ മണ്ഡലത്തിൽ എൻഡിഎ സ്ഥാനാർഥി സുരേഷ് ഗോപിയുടെ പ്രചരണത്തിന് മാറ്റ് കൂട്ടാനാണ് കുന്നംകുളം പരിഗണിക്കുന്നതെന്നാണ് വിലയിരുത്തൽ. അതേസമയം കരുവന്നൂർ വിഷയം തിരഞ്ഞെടുപ്പ് പ്രചാരണ വിഷയമാക്കാനും ബിജെപി ലക്ഷ്യമിടുന്നുണ്ട്.
ആറ്റിങ്ങലിൽ കേന്ദ്രമന്ത്രി വി മുരളീധരനാണ് എൻഡിഎ സ്ഥാനാർഥി. തിരുവനന്തപുരത്തെ എൻഡിഎ സ്ഥാനാർഥി കേന്ദ്രമന്ത്രി രാജീവ് ചന്ദ്രശേഖർ ഉൾപ്പെടെയുള്ളവർ പരിപാടിയിൽ പങ്കെടുക്കും. അതേസമയം നേരത്തെ ആലത്തൂരിൽ രമ്യാ ഹരിദാസിന്റെ തിരഞ്ഞെടുപ്പ് പ്രചാരണത്തിന് പ്രധാനമന്ത്രി എത്തുമെന്ന് അഭ്യൂഹങ്ങൾ ഉണ്ടായിരുന്നു. എന്നാൽ ഇത് സംബന്ധിച്ച് ഒരു തീരുമാനവും പാർട്ടി നേതൃത്വം അറിയിച്ചിട്ടില്ല.
കഴിഞ്ഞ വർഷം സെപ്റ്റംബറിൽ വന്ദേഭാരത് എക്സ്‌പ്രസ് ഉദ്ഘാടനം മുതൽ ഔദ്യോഗികവും പാർട്ടി പരിപാടികളിലുമായി ഇതിനോടകം പലതവണ പ്രധാനമന്ത്രി കേരളത്തിലെത്തിയിട്ടുണ്ട്. 2023 ഏപ്രിലിൽ കൊച്ചിയിൽ നടന്ന യുവജനസംഗമം, തൃശൂരിലെ വനിതാ സംഗമം, സുരേഷ് ഗോപിയുടെ മകളുടെ വിവാഹം, തുടർന്നുള്ള തൃപ്രയാർ ക്ഷേത്രദർശനം, കൊച്ചിയിൽ ഷിപ്‌യാർഡിലെ ഔദ്യോഗിക പരിപാടിക്കുശേഷം പാർട്ടിയുടെ റോഡ് ഷോ, തിരഞ്ഞെടുപ്പ് പ്രഖ്യാപനത്തിനു തൊട്ടുമുൻപ് പത്തനംതിട്ടയിൽ എൻഡിഎ സമ്മേളനം, തിരഞ്ഞെടുപ്പു പ്രഖ്യാപനത്തിനു ശേഷം പാലക്കാട് റോഡ് ഷോ എന്നിവയായിരുന്നു പ്രധാനമന്ത്രിയുടെ പ്രധാന പരിപാടികൾ.