ഇന്ത്യയില്‍ വികസനം എത്തിനോക്കാത്ത സംസ്ഥാനമാണ് കേരളമെന്ന് ബിജെപി സംസ്ഥാന പ്രസിഡന്റ് പി.എസ് ശ്രീധരന്‍പിള്ള. കേരളത്തിന് വികസനരംഗത്ത് ഒന്നും നേടാന്‍ സാധിച്ചിട്ടില്ലെന്നും അദ്ദേഹം പറഞ്ഞു.
ദേശീയപാത നിര്‍മ്മാണം അട്ടിമറിക്കാന്‍ കേന്ദ്രത്തിന് കത്തയച്ചെന്ന ആരോപണത്തിന് വിശദീകരണം നല്‍കാന്‍ നടത്തിയ പത്രസമ്മേളനത്തില്‍ സംസാരിക്കുകയായിരുന്നു അദ്ദേഹം. സിപിഎം ആസൂത്രിതമായി വിവാദമുണ്ടാക്കുകയാണെന്ന് അദ്ദേഹം പറഞ്ഞു. വ്യക്തിഹത്യ നടത്തുന്ന നിലപാടിനെ അപലപിക്കുന്നതായും അദ്ദേഹം പറഞ്ഞു.
ദേശീയപാത വികസനത്തിന് തടസം എന്താണെന്ന് ചോദിച്ചപ്പോള്‍ ഡല്‍ഹിയില്‍ പോയി അന്വേഷിക്കണമെന്നായിരുന്നു മറുപടി. താന്‍ കേന്ദ്രത്തിന് അയച്ച കത്തില്‍ നിയമാനുസൃതം പരിഗണിക്കണമെന്ന് ആവശ്യപ്പെട്ടിട്ടുണ്ട്. ദേശീയപാത വിഷയത്തില്‍ സിപിഎമ്മുകാരടക്കം എല്ലാ പാര്‍ട്ടിയിലുള്ളവര്‍ക്കും വേണ്ടിയാണ് താന്‍ കത്തയച്ചതെന്നും അദ്ദേഹം പറഞ്ഞു.