വയനാട് മുണ്ടക്കൈ പുനരധിവാസത്തിനുള്ള ഭൂമി 15 ദിവസത്തിനകം ഏറ്റെടുക്കുമെന്ന് റവന്യൂമന്ത്രി കെ രാജന്‍. പുനരധിവാസത്തിന് വേഗത കുറഞ്ഞോ എന്ന ആശങ്ക അസ്ഥാനത്താണെന്നും കെ രാജന്‍ പറഞ്ഞു. വിലങ്ങാട് ഉരുള്‍പൊട്ടല്‍ ദുരിതബാധിതരുടെ വാടക പ്രശ്‌നം പരിഹരിക്കുമെന്നും മന്ത്രി അറിയിച്ചു.
ഇതുസംബന്ധിച്ച് മുഖ്യമന്ത്രിയുടെ അധ്യക്ഷതയില്‍ ഉടന്‍ യോഗം ചേരും. പാലം പണി എപ്പോള്‍ പൂര്‍ത്തിയാകും എന്ന് പറയാനാവില്ലെന്നും മന്ത്രി കൂട്ടിച്ചേര്‍ത്തു. മുണ്ടക്കൈ പുനരധിവാസത്തിന് ബാധ്യതയുള്ള ഒരു ഭൂമിയും ഏറ്റെടുക്കില്ല. 1000 രൂപയുടെ സപ്ലൈകോ കാര്‍ഡ് മാസം തോറും ദുരന്തബാധിതര്‍ക്ക് നല്‍കുമെന്നും മന്ത്രി വ്യക്തമാക്കി.
വിലങ്ങാട് വീടും സ്ഥലവും നഷ്ടമായി വാടക വീട്ടിലേക്ക് മാറിയവര്‍ക്ക് സര്‍ക്കാര്‍ നല്‍കുന്ന വാടക തുക മൂന്ന് മാസമായി ലഭിക്കുന്നില്ലെന്ന് നേരത്തെ റിപ്പോര്‍ട്ടുകളുണ്ടായിരുന്നു. വാടക കിട്ടാത്തതിനെ തുടര്‍ന്ന് പലരും വീട്ടിലേക്ക് തിരിച്ചെത്തി. സാങ്കേതിക കാര്യം പറഞ്ഞ് വാടക നിഷേധിക്കുന്നതായും പരാതി ഉയര്‍ന്നിരുന്നു.
Read more
വിലങ്ങാട് 12 വീടുകളാണ് പൂര്‍ണമായും തകര്‍ന്നത്. 35 വീടുകള്‍ വാസയോഗ്യമല്ലാതായി. വയനാടിന് നല്‍കുന്ന എല്ലാ സഹായവും വിലങ്ങാടിനും നല്‍കുമെന്നായിരുന്നു പ്രഖ്യാപനം.
