കോതമംഗലത്തെ് സ്വകാര്യ സ്‌കൂളിന്റെ സെക്യൂരിറ്റി ഓഫീസില്‍ കഞ്ചാവ് വില്‍പ്പന. സെക്യൂരിറ്റി ജീവനക്കാര്‍ കഞ്ചാവ് സൂക്ഷിച്ച് വില്‍പ്പന നടത്തുകയായിരുന്നു. ഇവിടെ നിന്ന് കഞ്ചാവ് വാങ്ങാനെത്തിയ അഞ്ചുപേരെ കസ്റ്റഡിയില്‍ എടുത്തിട്ടുണ്ട്. എക്സൈസ് പരിശോധനയ്ക്കിടെ സെക്യൂരിറ്റി ജീവനക്കാര്‍ ഓടിരക്ഷപ്പെട്ടു.
എക്സൈസ് ഓഫീസില്‍ ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു പരിശോധന. സ്‌കൂളില്‍ ജോലി ചെയ്യുന്ന പാലാ സ്വദേശിയായ സാജു ബിജു എന്നയാളും നെല്ലിക്കുഴി സ്വദേശിയായ യാസിമും ചേര്‍ന്നാണ് വില്‍പ്പന നടത്തിയിരുന്നതെന്ന് എക്സൈസ് ഉദ്യോഗസ്ഥര്‍ പറഞ്ഞു.
പരിശോധനയ്ക്കിടെ വില്‍പ്പന നടത്തിയിരുന്ന രണ്ട് പേരും ഓടി രക്ഷപ്പെട്ടു. സെക്യൂരിറ്റി ഓഫീസിലും വാഹനങ്ങളിലും സൂക്ഷിച്ചിരുന്ന കഞ്ചാവും പിടിച്ചെടുത്തിട്ടുണ്ട്. സെക്യൂരിറ്റി ഓഫീസില്‍ പാക്കറ്റുകളിലാക്കി സൂക്ഷിച്ച നിലയിലായിരുന്നു കഞ്ചാവ്.
സിസി ടിവി സിസ്റ്റം തകരാറിലായിരുന്നതിനാല്‍ കഞ്ചാവ് വില്‍പ്പന സംബന്ധിച്ച വിവരങ്ങള്‍ തങ്ങളുടെ ശ്രദ്ധയില്‍പ്പെട്ടിരുന്നില്ലെന്ന് സ്‌കൂള്‍ അധികൃതര്‍ പ്രതികരിച്ചു.