കോഴിക്കോട് പന്തീരാങ്കാവില്‍ നവവധുവിന് മര്‍ദ്ദനമേറ്റ സംഭവത്തില്‍ പ്രതി രാഹുല്‍ പി ഗോപാല്‍ വിദേശത്തേക്ക് കടന്നതായി വെളിപ്പെടുത്തല്‍. പ്രതി തന്നെയാണ് ഇക്കാര്യം വെളിപ്പെടുത്തിയിരിക്കുന്നത്. പെണ്‍കുട്ടിയെ മര്‍ദ്ദിച്ചെന്നും രാഹുല്‍ പറഞ്ഞു. എന്നാല്‍ കാറിനോ സ്ത്രീധനത്തിനോ വേണ്ടിയായിരുന്നില്ല മര്‍ദ്ദനമെന്നും പ്രതി കൂട്ടിച്ചേര്‍ത്തു.
ജര്‍മ്മനിയില്‍ ജോലി നോക്കുന്ന തനിക്ക് നാട്ടില്‍ കാറിന്റെ ആവശ്യമില്ല. യുവതിയുടെ മൊബൈല്‍ ഫോണില്‍ നിന്ന് കണ്ടെത്തിയ ചില കാര്യങ്ങളാണ് പ്രകോപനം സൃഷ്ടിച്ചതെന്നും പ്രതി പറയുന്നു. യുവതിയുടെ ബന്ധുക്കളില്‍ നിന്നും കടുത്ത ഭീഷണി നിലനില്‍ക്കുന്നതിനാലാണ് താന്‍ രാജ്യം വിട്ടത്. നാട്ടില്‍ നില്‍ക്കാന്‍ കഴിയാത്ത സാഹചര്യമാണെന്നും പ്രതി കൂട്ടിച്ചേര്‍ത്തു.
എന്നാല്‍ പ്രതി രാജ്യം വിട്ടെന്നത് പൊലീസ് ഇതുവരെ സ്ഥിരീകരിച്ചിട്ടില്ല. ഒടുവിലായി പ്രതിയുടെ മൊബൈല്‍ ഫോണിന്റെ ലൊക്കേഷന്‍ കണ്ടെത്തിയത് കര്‍ണാടകയിലായിരുന്നു. അതേസമയം യുവതിയുടെ പരാതി ഗൗരവകരമായി എടുക്കാതിരുന്ന പന്തീരാങ്കാവ് എസ്എച്ച്ഒയെ കഴിഞ്ഞ ദിവസം സസ്‌പെന്റ് ചെയ്തിരുന്നു.