സിനിമ ചിത്രീകരണത്തിന് വേണ്ടി കൊണ്ട് വന്ന പുതുപ്പള്ളി സാധു എന്ന നാട്ടാന കാട്ടിലേക്ക് ഓടി കയറി. ഇന്നലെ രാത്രി വരെ നീണ്ട തിരച്ചിലിൽ കണ്ടെത്താൻ ഫോറസ്റ്റ് ഉദ്യോഗസ്ഥർക്കോ ആനയുടെ പാപ്പാൻമാർക്കോ സാധിച്ചില്ല. ഇന്ന് രാവിലെ 6.30 മുതൽ വീണ്ടും തിരച്ചിൽ പുനരാരംഭിച്ചിട്ടുണ്ട്. ആന അവശനിലയിൽ കിടന്നിട്ടുണ്ടാകും എന്ന കണക്കുകൂട്ടലിലാണ് പരിശോധന ഇപ്പോൾ നടക്കുന്നത്.
ഇന്നലെ വൈകിട്ടോടെയാണ് സംഭവം നടന്നത്. എറണാകുളം ഭൂതത്താൻകെട്ടിന് സമീപമാണ് ചിത്രീകരണം നടന്നത്. അഞ്ച് ആനകളെയാണ് അതിനായി ഉപയോഗിച്ചത്. അതിൽ രണ്ടാനകൾ തമ്മിൽ ഏറ്റുമുട്ടുകയായിരുന്നു. പുതുപ്പള്ളി സാധുവും, തടത്താവിള മണികണ്ഠന്‍ എന്ന ആനയുമാണ് ഏറ്റുമുട്ടിയത്.
ഏറ്റുമുട്ടലിൽ പരിക്കേറ്റ സാധു തുണ്ടം വനമേഖലയിലേക്ക് ഓടി. ഇന്നലെ രാത്രി വരെ തിരച്ചിൽ തുടർന്നെങ്കിലും കണ്ടെത്താനായില്ല. രാത്രിയിൽ കാട്ടിലുള്ള തിരച്ചിൽ അപകടമായതിനാലാണ് തിരച്ചിൽ അവസാനിപ്പിച്ചത്.
വിജയ് ദേവരക്കൊണ്ട നായകനാകുന്ന തെലുങ്ക് ചിത്രത്തിന്റെ ചിത്രീകരണത്തിന് വേണ്ടിയാണ് അഞ്ച് ആനകളെ എത്തിച്ചിരുന്നത്. സംഘട്ടന രംഗത്തിന്റെ ഭാഗമായിട്ടാണ് ആനകളെ ഉപയോഗിച്ചത്. അതിന് പിന്നാലെയാണ് സാധു എന്ന നാട്ടാനയെ തടത്താവിള മണികണ്ഠന്‍ തുടരെ ആക്രമിച്ചത്. പാപ്പാന്മാരുടെ നിർദേശം പാലിക്കാതെ ഏറ്റുമുട്ടൽ തുടർന്നതോടെയാണ് സാധു കാട്ടിലേക്ക് ഓടി കയറിയത്.