മലപ്പുറം മമ്പാട് വീട്ടമ്മയ്ക്ക് നേരെ ലൈംഗിക അതിക്രമം. വീട്ടില്‍ കയറി ആക്രമിക്കാന്‍ ശ്രമിച്ച പ്രായപൂര്‍ത്തിയാകാത്ത പ്രതി പിടിയിലായി. വീട്ടില്‍ മറ്റാരും ഇല്ലാത്ത സമയം നോക്കിയാണ് പ്രതി അതിക്രമിച്ച് കയറി വീട്ടമ്മയെ ആക്രമിച്ചത്.
വെളളിയാഴ്ച ഉച്ചയ്ക്കായിരുന്നു സംഭവം. വീട്ടമ്മയെ പ്രതി കടന്നുപിടിക്കുകയും ലൈംഗിക അതിക്രമം നടത്താന്‍ ശ്രമിക്കുകയും ചെയ്തു. ഇതിന് പുറമേ മൊബൈല്‍ ഫോണ്‍ മോഷ്ടിക്കാന്‍ ശ്രമിച്ചതായും പരാതിയുണ്ട്. ആക്രമണത്തില്‍ വീട്ടമ്മയ്ക്ക് ഗുരുതരമായി പരിക്കേറ്റു. തോളെല്ലിന് പൊട്ടലുണ്ട്.
ഇവരുടെ വീടിന് രണ്ട് കിലോമീറ്റര്‍ പരിധിയില്‍ തന്നെ താമസിക്കുന്ന പ്രതി ഏതാനും ദിവസങ്ങള്‍ നിരീക്ഷിച്ച ശേഷമാണ് ഇവര്‍ ഒറ്റയ്ക്കായിരുന്ന സമയത്ത് വീട്ടില്‍ കയറിയത്. ഈ സമയം പുറത്ത് പോയിരുന്ന ഭര്‍ത്താവ് തിരികെ എത്തിയപ്പോഴാണ് പരിക്കേറ്റ നിലയില്‍ വീട്ടമ്മയെ കണ്ടത്.
ഇവരുടെ പരാതിയുടെ അടിസ്ഥാനത്തില്‍ പൊലീസ് അന്വേഷണം ആരംഭിച്ചിരുന്നു. ഇന്നലെ രാത്രിയോടെയാണ് പ്രതി പിടിയിലായത്. ചോദ്യംചെയ്യലില്‍ ഇയാള്‍ കുറ്റം സമ്മതിച്ചട്ടുണ്ട്.
