സുനന്ദ പുഷ്‌കറിന്റെ ജന്മദിനമായിരുന്നു ഇന്നലെ. അവരെ കുറിച്ചുള്ള ഓര്‍മ്മകള്‍ പങ്കുവെച്ച് ഭര്‍ത്താവായ ശശി തരൂര്‍ എം.പി വൈകാരികമായി ട്വിറ്ററില്‍ കുറിച്ചു. “56 വര്‍ഷം മുമ്പാണ് ജമ്മു കാശ്മീരിലെ സോപാറില്‍ സുനന്ദ ജനിച്ചത്. ലില്ലി ആയിരുന്നു അവള്‍ക്ക് ഏറ്റവും പ്രിയപ്പെട്ട പൂക്കള്‍. കുറച്ച് പൂക്കള്‍ ഒരു സുഹൃത്ത് ഇന്ന് രാവിലെ അയച്ചു തന്നു” സുനന്ദയുടെ ചിത്രം പങ്കുവെച്ച് ശശി തരൂര്‍ ട്വീറ്റ് ചെയ്തു.
2010 ഓഗസ്റ്റിലായിരുന്നു ശശി തരൂരും സുനന്ദയും തമ്മിലുള്ള വിവാഹം. 2014 ജനുവരി 17ന് സുനന്ദയെ ഡല്‍ഹിയിലെ ലീല ഹോട്ടലിലെ മുറിയില്‍ മരിച്ച നിലയില്‍ കണ്ടെത്തി. സുനന്ദയുടേത് ആത്മഹത്യ അല്ലെന്നും കൊലപാതകമാണെന്നും ആദ്യ നാളുകളില്‍ ആരോപണം ഉണ്ടായിരുന്നു. സുനന്ദയുടെ മരണവുമായി ബന്ധപ്പെട്ട് ശശി തരൂര്‍ അടക്കം പ്രതിക്കൂട്ടിലായി. കേസ് ഇപ്പോഴും നടന്നു കൊണ്ടിരിക്കുകയാണ്.
ജമ്മു കശ്മീരിലെ ബോമൈ സ്വദേശിനിയായ സുനന്ദ കരസേനയില്‍ ലഫ്.കേണലായിരുന്ന പുഷ്‌കര്‍ദാസ് നാഥിന്റെയും പരേതയായ ജയാ ദാസിന്റെയും മകളാണ്. കശ്മീരിയായ സഞ്ജയ് റെയ്‌നയെയായിരുന്നു ആദ്യ ഭര്‍ത്താവ്. വിവാഹമോചനം നേടി പിന്നീട് മലയാളി വ്യവസായി സുജിത് മേനോനെ വിവാഹം കഴിച്ചു. അദ്ദേഹം കാറപകടത്തില്‍ മരിക്കുകയായിരുന്നു.