മലയാളത്തിലെ മുതിര്‍ന്നതാരങ്ങള്‍ പാര്‍വതിക്ക് പിന്തുണ നല്‍കണമെന്നും താന്‍ ഉറച്ച പിന്തുണ നല്‍കുന്നുവെന്നും ശശി തരൂര്‍ എംപി. കസബ വിവാദത്തില്‍ സൈബര്‍ ആക്രമണം നേരിടേണ്ടി വന്ന പാര്‍വതിക്കാണ് ശശി തരൂര്‍ പിന്തുണ പ്രഖ്യാപിച്ചത്.
“ഞാന്‍ സിനിമ കണ്ടിട്ടില്ല. സിനിമയെ ക്കുറിച്ച് അഭിപ്രായങ്ങള്‍ പറയാന്‍ പാര്‍വതിക്ക് അവകാശമുണ്ട്, ബലാത്സംഗ ഭീഷണിയും വധഭീഷണിയും നേരിടാതെ തന്നെ. പാര്‍വതി ഉന്നയിച്ച കാര്യങ്ങളില്‍ മുതിര്‍ന്ന താരങ്ങള്‍ പിന്തുണയ്ക്കണം” ശശി തരൂര്‍ ട്വീറ്റ് ചെയ്തു.
കസബയിലെ സ്ത്രീ വിരുദ്ധതയെപ്പറ്റി അഭിപ്രായപ്പെട്ട പാര്‍വതിക്ക് നേരെ സൈബര്‍ ആക്രമണം നേരിട്ടതിനെ തുടര്‍ന്ന് പോലീസില്‍ പരാതി നല്‍കിയിരുന്നു. വടക്കാഞ്ചേരി സ്വദേശി പ്രിന്റോയെ പോലീസ് അറസ്റ്റ് ചെയ്തു. പാര്‍വതിയെ കൊല്ലുമെന്നും ബലാത്സംഗം ചെയ്യുമെന്നും ഭീഷണി വന്നതിനെ തുടര്‍ന്നാണ് പാര്‍വതി പരാതി നല്‍കിയത്.