കൊലപാതക രാഷ്ട്രീയത്തിന്റെ കാര്യത്തില്‍ സിപഐഎമ്മും കോണ്‍ഗ്രസും ഒരുപോലെയെന്ന് ഇടുക്കി സിപിഐ ജില്ലാ സെക്രട്ടറി കെ കെ ശിവരാമന്റെ പ്രസ്താവന. അതേസമയം എതിരാളികള്‍ക്ക് കളമൊരുക്കുകയാണ് സിപിഐയെന്ന് സിപിഐഎം ഇടുക്കി ജില്ലാ സെക്രട്ടറി സി വി വര്‍ഗീസിന്റെ മറുപടി. ഇടുക്കിയില്‍ ഡിസിസി പ്രസിഡന്റ് സി പി മാത്യുവും, സിപിഎം ജില്ലാ സെക്രട്ടറി സിവി വര്‍ഗീസും തമ്മിലുള്ള വാഗ്വാദങ്ങളെ വിമര്‍ശിച്ചാണ് ശിവരാമന്‍ പ്രസ്താവന നടത്തിയത്. ഇരുവരും കൊലപാതക രാഷ്ട്രീയത്തിന് ആഹ്വാനം ചെയ്യുകയാണെന്നും ശിവരാമന്‍ കുറ്റപ്പെടുത്തി. കൊലപാതക രാഷ്ട്രീയത്തില്‍ കോണ്‍ഗ്രസും സിപിഎമ്മും തമ്മിലെന്ത് വ്യത്യാസമെന്നും ശിവരാമന്‍ ചോദിക്കുന്നു.
ഇതിന് മറുപടിയെന്നോണമാണ് സി വി വര്‍ഗീസ് ശിവരാമനെതിരെ രംഗത്തെത്തിയത്. എതിരാളികള്‍ക്ക് കളമൊരുക്കുകയാണ് ശിവരാമന്റെ പ്രസ്താവനയിലൂടെയെന്ന് വര്‍ഗീസ് കുറ്റപ്പെടുത്തുന്നു. എം എം മണിയെ പൊലീസ് അറസ്റ്റ് ചെയ്തപ്പോള്‍ അര്‍ഹതപ്പെട്ടത് കിട്ടിയെന്ന് പ്രതികരിച്ചയാളാണ് കെ കെ ശിവരാമന്‍. ഇടതുമുന്നണി കൂട്ടായി നിന്ന് ജനങ്ങളുടെ പ്രശ്നങ്ങള്‍ പരിഹരിക്കാന്‍ ശ്രമിക്കുമ്പോള്‍ എല്‍ഡി എഫ് ജില്ലാ കണ്‍വീനര്‍ തന്നെ ഇത്തരം പ്രസ്താവനകള്‍ നടത്തുന്നത് ശരിയല്ലെന്നും സി വി വര്‍ഗ്ഗീസ് പറഞ്ഞു.
ജില്ലാ സെക്രട്ടറിമാരുടെ പ്രസ്താവനയോടെ ഒരിടവേളയ്ക്ക് ശേഷം വീണ്ടും ഇടുക്കിയില്‍ സിപിഎം സിപിഐ പോര് ആവര്‍ക്കുകയാണ്. നേരത്തെ പല തവണ ഇരു പാര്‍ട്ടികളും ഇടുക്കിയില്‍ കനത്ത പോരിന് കളമൊരുക്കിയിരുന്നു.