പോക്‌സോ കേസില്‍ പ്രതിയായ ഫോര്‍ട്ടകൊച്ചി നമ്പര്‍ 18 ഹോട്ടല്‍ ഉടമ റോയ് വയലാട്ട് ഒളിവില്‍. ഹൈക്കോടതി മുന്‍കൂര്‍ ജാമ്യാപേക്ഷ നിഷേധിച്ച് ആറ് ദിവസം പിന്നിട്ടിട്ടും പ്രതിയെ പിടികൂടാന്‍ കഴിഞ്ഞിട്ടില്ല. കേസിലെ രണ്ടാം പ്രതിയും റോയിയുടെ സുഹൃത്തുമായ സൈജു തങ്കച്ചനും ഒളിവിലാണ്.
ഹൈക്കോടതി ജാമ്യം നിഷേധിച്ചതിനെ തുടര്‍ന്ന് ഇരുവരും സുപ്രീംകോടതിയെ സമീപിച്ചിരുന്നു. ഇരയുടെ രഹസ്യമൊഴി ഉള്‍പ്പെടെ പരിശോധിച്ചതിന് ശേഷമാണ് ഹൈക്കോടതി ജാമ്യാപേക്ഷ നിഷേധിച്ചത്. അതിനാല്‍ കേസില്‍ ഇടപെടാന്‍ കഴിയില്ല എന്ന് സുപ്രീംകോടതി അറിയിച്ചു. ഇതേ തുടര്‍ന്ന് ഇരുവരുമ ജാമ്യാപേക്ഷ പിന്‍വലിക്കുകയും ചെയ്തു. എന്നാല്‍ കേസിലെ മൂന്നാം പ്രതിയായ അഞ്ജലി റിമാ ദേവിന് ഹൈക്കോടതി ജാമ്യം അനുവദിച്ചിരുന്നു.
2021 ഒക്ടോബറില്‍ ഹോട്ടല്‍ മുറിയില്‍ വെച്ച് റോയി പീഡിപ്പിച്ചു എന്ന് കോഴിക്കോട് സ്വദേശിയായ അമ്മയും മകളുമാണ് പരാതി നല്‍കിയത്. സംഭവത്തിന്റെ ദൃശ്യങ്ങള്‍ പ്രതികള്‍ മൊബൈല്‍ ഫോണില്‍ പകര്‍ത്തി. ഇക്കാര്യം പുറത്തു പറഞ്ഞാല്‍ ദൃശ്യങ്ങള്‍ പ്രചരിപ്പിക്കുമെന്ന് അഞ്ജലി ഭീഷണിപ്പെടുത്തിയിരുന്നു എന്നും പരാതിയില്‍ പറയുന്നു. ഫോര്‍ട്ട്‌കൊച്ചി പൊലീസ് രജിസ്റ്റര്‍ ചെയ്ത കേസ് പിന്നീട് മോഡലുകളുടെ കേസ് അന്വേഷിച്ച സംഘത്തിന് കൈമാറുകയായിരുന്നു.