മലപ്പുറം നിലമ്പൂരില്‍ ചാലിയാര്‍ പുഴയില്‍ ഒഴുക്കില്‍പ്പെട്ട് അധ്യാപകന്‍ മരിച്ചു. കണ്ണൂര്‍ സ്വദേശിയായ പള്ളിയാമൂല നസീമ മന്‍സില്‍ മുഹമ്മദ് നജീബ് (37) ആണ് മരിച്ചത്. മയിലാടി അമല്‍ കോളജിലെ കായികാധ്യാപകനാണ് നജീബ്.
മയിലാടി പാലത്തിനടുത്ത് ഇന്ന് പുലര്‍ച്ചെയാണ് സംഭവം. ചാലിയാറില്‍ മയിലാടിക്കടവില്‍ കുടുംബത്തോടൊപ്പം കുളിക്കാന്‍ എത്തിയതാണ് നജീബ്. നജീബും, പിതാവും, ഭാര്യയുടെ സഹോദരിയുടെ ഭര്‍ത്താവും കുളിക്കാന്‍ ഇറങ്ങിയിരുന്നു. ഇതിനിടെയാണ് ഇവര്‍ ഒഴുക്കില്‍ പെടുന്നത്. പിതാവിനെ രക്ഷപ്പെടുത്തുന്നതിന് ഇടയില്‍ നജീബ് ചുഴിയില്‍ പെട്ടു. മറ്റ് രണ്ട് പേരെയും പുഴയില്‍ മീന്‍ പിടിക്കാന്‍ എത്തിയവര്‍ വന്ന് രക്ഷപ്പെടുത്തുകയായിരുന്നു.
അപകടത്തെ തുടര്‍ന്ന് അഗ്നിരക്ഷാസേനയും പൊലീസും സ്ഥലത്തെത്തി. ഒരു മണിക്കൂറിലധികം നീണ്ട തിരച്ചിലിനൊടുവിലാണ് നജീബിന്റെ മൃതദേഹം കണ്ടെത്തിയത്. മൃതദേഹം നിലമ്പൂരിലെ ജില്ല ആശുപത്രി മോര്‍ച്ചറിയിലേക്ക് മാറ്റി.