മുപ്പത്തിയെട്ട് വര്‍ഷങ്ങള്‍ക്ക് ശേഷം തൃശൂര്‍ ശ്രീ കേരള വര്‍മ കോളേജില്‍ കെഎസ്‌യുവിന് വിജയം. കെഎസ്‌യു സ്ഥാനാര്‍ത്ഥി ശ്രീക്കുട്ടന്‍ ആണ് കോളേജ് യൂണിയന്‍ ചെയര്‍മാന്‍ സ്ഥാനത്തേക്കുള്ള തിരഞ്ഞെടുപ്പില്‍ വിജയിച്ചത്. 38 വര്‍ഷങ്ങള്‍ക്ക് ശേഷമാണ് കെഎസ്‌യു ജനറല്‍ സീറ്റില്‍ വിജയിക്കുന്നത്. ഒരു വോട്ടിന്റെ വ്യത്യാസത്തിലാണ് കെഎസ്‌യു വിജയിച്ചത്.
പാലക്കാട് മുണ്ടൂര്‍ സ്വദേശിയായ ശ്രീക്കുട്ടന്‍ കാഴ്ച പരിമിതി നേരിടുന്ന വിദ്യാര്‍ത്ഥിയാണ്. അതേ സമയം കെഎസ്‌യുവിന്റെ വിജയത്തിന് പിന്നാലെ എസ്എഫ്‌ഐ റീക്കൗണ്ടിംഗ് ആവശ്യപ്പെട്ട് രംഗത്തെത്തി. എന്നാല്‍ റീക്കൗണ്ടിംഗ് നടക്കുന്നതിനിടെ കോളേജിലെ വൈദ്യുതി നിലച്ചത് തര്‍ക്കങ്ങള്‍ക്കിടയാക്കി.
എസ്എഫ്‌ഐ ബോധപൂര്‍വ്വം വൈദ്യുതി വിച്ഛേദിച്ചതാണെന്ന് കെഎസ്‌യു ഉള്‍പ്പെടെയുള്ള മറ്റ് വിദ്യാര്‍ത്ഥി യൂണിയനുകള്‍ ആരോപിച്ചു. സംഘര്‍ഷ സാധ്യത കണക്കിലെടുത്ത് കോളേജില്‍ ശക്തമായ പൊലീസ് കാവല്‍ ഏര്‍പ്പെടുത്തിയിട്ടുണ്ട്.