കണ്ണൂരിൽ ബോംബ് പരിശോധന ശക്തമാക്കുന്നതിനിടയിൽ സ്റ്റീൽ ബോംബുകൾ കണ്ടെത്തി. കൂത്ത്പറമ്പിലാണ് ബോംബുകൾ കണ്ടെത്തിയത്. കണ്ടെത്തിയ ബോംബുകൾ ഉഗ്രശേഷിയുള്ളവയാണെന്ന് പോലീസ് പറഞ്ഞു. കോഴിക്കോട്, കണ്ണൂർ, കാസർകോട് ജില്ലകളിൽ നിന്നുൾപ്പെടെ അഞ്ച് ബോംബ് സ്‌ക്വാഡുകളുടെ നേതൃത്വത്തിലായിരുന്നു പരിശോധന. ഇതിനിടെയാണ് ഇപ്പോൾ ബോംബ് കണ്ടെത്തിയിരിക്കുന്നത്. ഈ സാഹചര്യത്തിൽ കൂടുതൽ പരിശോധനകൾ ശക്തമാക്കാനാണ് പോലീസ് തീരുമാനം.
കൂത്തുപ്പറമ്പ് പോലീസ് നടത്തിയ പരിശോധനയിലാണ് ആളൊഴിഞ്ഞ പറമ്പിൽ ബോംബുകൾ കണ്ടെത്തിയത്. കിണറ്റിൻ്റവിട ആമ്പിലാട് റോഡിന് സമീപം വഴിയരികിലെ പറമ്പിൽനിന്ന് രണ്ടു ബോംബുകളാണ് കണ്ടെടുത്തത്. കഴിഞ്ഞദിവസം ബോംബ് പൊട്ടിതെറിച്ച് വേലായുധൻ എന്നയാൾ മരിച്ചതിന് പിന്നാലെയാണ് പൊലീസ് പരിശോധന ശക്തമാക്കിയത്.
വീടിനോട് ചേർന്നുള്ള പറമ്പിൽ തേങ്ങ പെറുക്കാൻ എത്തിയ വേലായുധൻ പറമ്പിൽനിന്ന് കിട്ടിയ വസ്തു തുറന്ന് നോക്കിയപ്പോൾ പൊട്ടിത്തെറിക്കുകയായിരുന്നു. സംഭവത്തിൽ വലിയ പ്രതിഷേധമാണുണ്ടായത്. സംഭവത്തിന് പിന്നാലെ ജില്ലയിലെ വിവിധ ഭാഗങ്ങളിൽ പോലീസ് പരിശോധന ശക്തമാക്കിയിരുന്നു. കൂത്തുപ്പറമ്പ്, തലശ്ശേരി, മാഹി, മട്ടന്നൂർ എന്നിവിടങ്ങളിലായിരുന്നു പ്രധാനമായും തിരച്ചിൽ.