തെരുവ് നായ്ക്കളുടെ ആക്രമണത്തെ തുടര്‍ന്ന് ഒരു വയസുകാരന് ഗുരുതര പരിക്ക്. കൊല്ലം മയ്യനാട് പുല്ലിച്ചിറ സ്വദേശി ആതിരയുടെയും രാജേഷിന്റെയും മകന്‍ അര്‍ണവ് ആദവിനാണ് നായ്ക്കളുടെ കടിയേറ്റത്. ഇന്നലെ ഉച്ചയ്ക്ക് 12.30 നായിരുന്നു സംഭവം.
വീടിന്റെ വരാന്തയില്‍ കളിക്കുകയായിരുന്ന അര്‍ണവിനെ കൂട്ടമായി എത്തിയ തെരുവുനായ്ക്കള്‍ ആക്രമിക്കുകയായിരുന്നു. കുഞ്ഞിനെ കടിച്ചെടുത്ത് അഞ്ച് മീറ്റര്‍ ദൂരത്തേക്ക് വലിച്ചിഴച്ച് കൊണ്ടുപോയി റോഡിലിട്ടും കടിച്ചു.
അയല്‍വാസിയും ഒരു ബൈക്ക് യാത്രക്കാരനും ചേര്‍ന്ന് കുഞ്ഞിനെ രക്ഷിക്കുകയായിരുന്നു. തലക്കും കണ്ണിനും കഴുത്തിലും ഗുരുതരമായി പരുക്കേറ്റ അര്‍ണവിനെ ആദ്യം സമീപത്തുള്ള സ്വകാര്യ ആശുപത്രിയിലും പിന്നീട് ജില്ലാ ആശുപത്രിയിലും പ്രവേശിപ്പിച്ചു.
Read more
അപകടം നടക്കുന്ന സമയം അര്‍ണവും മുത്തശ്ശിയും മാത്രമായിരുന്നു വീട്ടില്‍ ഉണ്ടായിരുന്നത്. മുത്തശ്ശി വീടിനുള്ളിലേക്ക് പോയപ്പോള്‍ ആയിരുന്നു തെരുവുനായ്ക്കളുടെ അക്രമം. ദേഹമാസകലം കടിയേറ്റ കുഞ്ഞിനെ ചികിത്സയ്ക്ക് ശേഷം വീട്ടിലേക്ക് കൊണ്ടുപോയി.
