പാലക്കാട് മണ്ണാര്‍ക്കാട് ഓടിക്കൊണ്ടിരിക്കുന്ന ബസില്‍ നിന്ന് വീണ് വിദ്യാര്‍ത്ഥിക്ക് പരിക്ക്. വിദ്യാര്‍ത്ഥി വീണത് കണ്ടിട്ടും ബസ് നിര്‍ത്താതെ പോയി. ഇന്ന് രാവിലെ 9 മണിക്കാണ് സംഭവമുണ്ടായത്. മണ്ണാർക്കാട് നിന്ന് തെങ്കരയിലേക്ക് സർവീസ് നടത്തുന്ന ‘ശാസ്താ’ ബസിൽ നിന്ന് വീണാണ് കുട്ടിക്ക് പരിക്കേറ്റത്.
ചങ്ങലീരി സ്വദേശിനിയും പ്ലസ് ടു വിദ്യാർത്ഥിനിയുമായ മർജാനക്കാണ് പരിക്കേറ്റത്. ബസിൽ നിന്ന് ഇറങ്ങുന്നതിനിടെ പെട്ടെന്ന് ബസ് എടുക്കുകയും, താൻ വീണത് കണ്ടിട്ടും ബസ് നിർത്തിയില്ലെന്നും വിദ്യാർത്ഥിനി പറയുന്നു. വീട്ടുകാർ പൊലീസിൽ പരാതി നൽകും.
പാലക്കാട് ഇന്ന് മറ്റൊരു വിദ്യാര്‍ത്ഥിക്കും ബസില്‍ നിന്ന് പരിക്കേറ്റിട്ടുണ്ട്. സ്വകാര്യ ബസിന്റെ വാതിലിനിടയില്‍പ്പെട്ട് വിദ്യാര്‍ത്ഥിയുടെ കൈയൊടിയുകയായിരുന്നു. പാലക്കാട് ബിഇഎം സ്‌കൂളിലെ ഏഴാം ക്ലാസ് വിദ്യാര്‍ത്ഥിക്കാണ് പരിക്കേറ്റത്. ബസ് ജീവനക്കാരന്‍ അശ്രദ്ധയോടെ വാതിലടച്ചതാണ് അപകടമുണ്ടാക്കിയതെന്ന് വിദ്യാര്‍ത്ഥി ആരോപിച്ചു.
