തിരുവനന്തപുരത്ത് പോക്‌സോ കേസില്‍ ഒളിവിലായിരുന്ന അധ്യാപകനെ പൊലീസ് പിടികൂടി. ആറ് പോക്‌സോ കേസുകളില്‍ പ്രതിയായ ബിനോജ് കൃഷ്ണയാണ് പിടിയിലായത്. സ്‌കൂളില്‍ നടത്തിയ കൗണ്‍സിലിംഗിനിടെ ആയിരുന്നു പ്രതിയ്‌ക്കെതിരെ കുട്ടികള്‍ വെളിപ്പെടുത്തല്‍ നടത്തിയത്.
ഇതിന് പിന്നാലെ പ്രതിയ്‌ക്കെതിരെ പരാതിയുമായി രക്ഷിതാക്കളും രംഗത്തെത്തിയിരുന്നു. രക്ഷിതാക്കള്‍ ഇയാള്‍ക്കെതിരെ പൊലീസില്‍ പരാതി നല്‍കിയതോടെ പ്രതി ഒളിവില്‍ പോകുകയായിരുന്നു. ഇയാള്‍ക്കെതിരെ പൊലീസ് ആറ് പോക്‌സോ കേസുകളാണ് രജിസ്റ്റര്‍ ചെയ്തിട്ടുള്ളത്. കഴിഞ്ഞ ഒരാഴ്ചയായി പ്രതി ഒളിവിലായിരുന്നു.
ഇതേ തുടര്‍ന്ന് പ്രതിയുടെ മൊബൈല്‍ ഫോണ്‍ കേന്ദ്രീകരിച്ച് നടത്തിയ അന്വേഷണത്തില്‍ ഇയാള്‍ തിരുവനന്തപുരത്ത് തന്നെ ഒരു ലോഡ്ജിലുണ്ടെന്ന് പൊലീസ് കണ്ടെത്തി. പൊലീസ് പിടികൂടുമെന്ന് മനസിലാക്കിയ പ്രതി ആത്മഹത്യ ശ്രമം നടത്തി. പൊലീസ് ഇയാളെ ആശുപത്രിയിലെത്തിച്ച് പ്രാഥമിക ചികിത്സ നല്‍കിയ ശേഷം കസ്റ്റഡിയിലെടുത്തിട്ടുണ്ട്.
