Connect with us
https://southlive.in/wp-content/uploads/2018/08/728-x-90-pix.jpg

KERALA

ഇത്തവണയും കരിപ്പൂരിന്റെ ചിറകരിഞ്ഞു; ‘ഹജ്ജ് വിമാനങ്ങള്‍ക്ക് അനുമതി നല്‍കാതെ കേന്ദ്രസര്‍ക്കാര്‍’

, 1:39 pm

കരിപ്പൂര്‍ വിമാനത്താവളത്തില്‍ നിന്നും ഈ വര്‍ഷവും ഹജ്ജ് വിമാനങ്ങള്‍ ഉയരില്ലെന്ന് ഏകദേശം ഉറപ്പായി. കേന്ദ്ര വ്യോമയാന മന്ത്രാലയത്തിന്റെ ലിസ്റ്റില്‍ കേരളത്തില്‍ നിന്നും നെടുമ്പാശേരി വിമാനത്താവളം മാത്രമാണുള്ളത്. വലിയ വിമാനങ്ങള്‍ സര്‍വീസ് നടത്താന്‍ അനുമതി ലഭിച്ചിട്ടുണ്ടെങ്കിലും ഹജ്ജു സര്‍വീസുകളുണ്ടാവില്ല. ഏറ്റവുമധികം ഹജ്ജ് തീര്‍ത്ഥാടകരുള്ള മലബാറുകാര്‍ക്കു ഇത്തവണയും യാത്രക്കായി കൊച്ചിയിലെത്തേണ്ടിവരും.

കരിപ്പൂരിനേക്കാള്‍ ചെറിയ എട്ട് വിമാനത്താവളങ്ങളെയടക്കം ഉള്‍പ്പെടുത്തിയാണ് ഈ വര്‍ഷത്തെ ഹജ്ജ് സര്‍വിസുകള്‍ക്ക് വിമാന കമ്പനികളില്‍നിന്ന് കേന്ദ്ര വ്യോമയാന മന്ത്രാലയം ടെന്‍ഡര്‍ ക്ഷണിച്ചത്. കേരളത്തില്‍ വിമാനത്താവളത്തിന്റെ വലിപ്പം നോക്കി ഹജ്ജ് എംബാര്‍ക്കേഷന്‍ പോയിന്റ് നിശ്ചയിക്കുന്ന കേന്ദ്രം മറ്റു സംസ്ഥാനങ്ങളില്‍ ഈ മാനദണ്ഡങ്ങളൊന്നും മുഖവിലക്കെടുക്കുന്നില്ല. മംഗലാപുരത്തിന് പുറമെ കരിപ്പൂരിനെക്കാള്‍ ചെറിയ റണ്‍വേയുള്ള ലഖ്നൗ, ഭോപ്പാല്‍, ഇന്‍ഡോര്‍, വാരാണസി,റാഞ്ചി, ഔറംഗാബാദ്, ഗയ എന്നീ വിമാനത്താവളങ്ങളും ഈ വര്‍ഷവും ലിസ്റ്റിലുണ്ട്. 2860 മീറ്റര്‍ റണ്‍വേ നീളമുള്ള കരിപ്പൂരിനെ തഴഞ്ഞപ്പോള്‍ 2286 മീറ്റര്‍ റണ്‍വേയുള്ള ഗയ വിമാനത്താളവം ലിസ്റ്റില്‍ ഇടം പിടിച്ചിട്ടുണ്ട്. 2450 മീറ്റര്‍ മാത്രമാണ് മംഗലാപുരത്ത് റണ്‍വേയുള്ളത്.

കരിപ്പൂരിനേക്കാള്‍ ചെറിയ എട്ട് വിമാനത്താവളങ്ങളില്‍നിന്ന് ഇടത്തരം എ310,320 വിമാനങ്ങള്‍ക്ക് അനുമതി നല്‍കാനാണ് ശ്രമം. മൂന്ന് വര്‍ഷം മുന്‍പ് കരിപ്പൂരിലെ റണ്‍വേ നവീകരണത്തിനായി അടച്ചതിനെ തുടര്‍ന്നാണ് ഹജ്ജ് സര്‍വിസുകള്‍ കൊച്ചിയിലേക്ക് മാറ്റിയത്. ഒരു താല്‍കാലിക സംവിധാനം എന്നനിലയിലായിരുന്നു ഈ മാറ്റം. സംസ്ഥാനത്തുനിന്ന് ഹജ്ജ് കര്‍മത്തിനു പോകുന്നവരില്‍ 80 ശതമാനവും ഇത്തവണയും മലബാര്‍ മേഖലയില്‍ നിന്നുള്ളവരാണ്. ഹജ്ജ് സര്‍വിസുകള്‍ കരിപ്പൂരിലേക്ക് മാറ്റണമെന്ന് ആവശ്യപ്പെട്ട് സംസ്ഥാന ഹജ്ജ് കമ്മറ്റി സുപ്രിംകോടതിയില്‍ ഹരജി നല്‍കിയിട്ടുണ്ട്. ഇതില്‍ കേന്ദ്രം നല്‍കിയ സത്യവാങ്മൂലമാകട്ടെ കരിപ്പൂര്‍ ചെറിയ വിമാനത്താവളമാണെന്നായിരുന്നു.

ഹജ്ജ് സര്‍വിസ് നടത്തുന്ന എയര്‍ ഇന്ത്യയോ, സഊദി എയര്‍ലൈന്‍സോ ഹജ്ജ് യാത്രകള്‍ക്ക് വലിയ വിമാനങ്ങള്‍ ഉപയോഗിക്കുന്നില്ല. അതുകൊണ്ടുതന്നെ വലിയ വിമാനങ്ങളുടെ നിയന്ത്രണത്തിന്റെ പേരില്‍ കരിപ്പൂരിനെ തഴയാനുമാവില്ല. കഴിഞ്ഞ വര്‍ഷം സൗദി എയര്‍ലൈന്‍സ് ഇടത്തരം വിമാനങ്ങളാണ് ഹജ്ജ് സര്‍വിസിന് ഉപയോഗിച്ചിരുന്നത്. അനുമതി ലഭിച്ചാല്‍ ഇത്തരം വിമാനങ്ങള്‍ കരിപ്പൂരില്‍ സര്‍വിസിന് എത്തിക്കാമെന്ന് വിമാന കമ്പനി അധികൃതര്‍ പറയുമ്പോഴും കേന്ദ്ര വ്യോമയാന മന്ത്രാലയം കരിപ്പൂരിനോടുള്ള നയം തുടരുകയാണ്.

Advertisement