തിരുവനന്തപുരത്ത് പെണ്‍കുട്ടിയെ ബലാത്സംഗം ചെയ്യാന്‍ ശ്രമിച്ച ഗംഗേശാനന്ദയുടെ ജനനേന്ദ്രിയം മുറിച്ച സംഭവത്തില്‍ ക്രൈംബ്രാഞ്ച് കുറ്റപത്രം സമര്‍പ്പിച്ചു. സംഭവത്തില്‍ രണ്ട് കേസുകളാണ് രജിസ്റ്റര്‍ ചെയ്തിരുന്നത്. പെണ്‍കുട്ടിയെ ബലാത്സംഗം ചെയ്യാന്‍ ശ്രമിച്ച ഗംഗേശാനന്ദയ്‌ക്കെതിരെ ആയിരുന്നു ആദ്യ കേസ്.
ഇതില്‍ ഗംഗേശാനന്ദയ്‌ക്കെതിരെ ബലാത്സംഗ കുറ്റം ചുമത്തിയാണ് കുറ്റപത്രം സമര്‍പ്പിച്ചത്. ബലാത്സംഗത്തിനിടെയാണ് പെണ്‍കുട്ടി ഇയാളുടെ ജനനേന്ദ്രിയം മുറിച്ചതെന്ന് പരാതിയില്‍ പറയുന്നു. എന്നാല്‍ രണ്ടാമത്തെ കേസ് പെണ്‍കുട്ടിയ്ക്കും സുഹൃത്ത് അയ്യപ്പദാസിനും എതിരെയാണ്. ജനനേന്ദ്രിയം മുറിച്ച കേസില്‍ പെണ്‍കുട്ടിയ്‌ക്കെതിരെയും ഉടന്‍ കുറ്റപത്രം സമര്‍പ്പിക്കും.
2017 മെയ് 19ന് പേട്ടയിലായിരുന്നു സംഭവം നടന്നത്. ഗംഗേശാനന്ദയുടെ പീഡനം തടയാന്‍ ജനനേന്ദ്രിയം മുറിച്ചു എന്നായിരുന്നു പെണ്‍കുട്ടി പൊലീസിന് മൊഴി നല്‍കിയത്. ഇതിന് പിന്നാലെ ഗംഗേശാനന്ദയ്‌ക്കെതിരെ പൊലീസ് കേസെടുക്കുകയായിരുന്നു. എന്നാല്‍ അന്വേഷണം പുരോഗമിക്കുന്നതിനിടെ പെണ്‍കുട്ടി മൊഴി മാറ്റി. ഇതോടെയാണ് കേസ് ക്രൈംബ്രാഞ്ചിലേക്കെത്തുന്നത്.