എറണാകുളം ഉണിച്ചിറയിൽ ലിഫ്റ്റിൻ്റെ റോപ്പ് പൊട്ടി ചുമട്ടുതൊഴിലാളി മരിച്ചു. ഉണിച്ചിറയിലെ സിഐടിയു പ്രവർത്തകൻ നസീർ (42) ആണ് മരിച്ചത്. പ്രോകണക്ട് ഇന്റഗ്രേറ്റഡ് ലോജിസ്റ്റിക്സ് വെയർഹൗസ് ഗോഡൗണിലേക്ക് എത്തിയ സാധനങ്ങൾ മുകളിലേക്ക് കൊണ്ടു പോയപ്പോൾ വടം പൊട്ടി ലിഫ്റ്റ് താഴേക്ക് പതിക്കുകയായിരുന്നു.
വൈകിട്ട് 5.30 നായിരുന്നു സംഭവം. അപകടത്തിന് പിന്നാലെ നസീറിനെ തൃക്കാക്കരയിലെ ആശുപത്രിയിലെത്തിച്ചെങ്കിലും രക്ഷിക്കാനായില്ല. ജിയോജിത്ത് ബിൽഡിംഗിൽ പ്രവർത്തിച്ചു വരുന്ന പ്രോകണക്ട് ഇന്റഗ്രേറ്റഡ് ലോജിസ്റ്റിക്സ് എന്ന സ്ഥാപനത്തിൻ്റെ വെയർഹൗസ് ഗോഡൗണിൽ ഐടി പ്രോഡക്ട് സാധനങ്ങൾ കയറ്റാൻ എത്തിയതായിരുന്നു നസീറും സഹപ്രവർത്തകരും.
സർവ്വീസ് ലിഫ്റ്റിൽ സാധനങ്ങൾ കയറ്റി മുകളിലെ നിലയിലേക്ക് അയച്ച ശേഷം, ലിഫ്റ്റിൻ്റെ താഴെ ഉണ്ടായിരുന്ന മരത്തിന്റെ സ്റ്റാൻഡ് മാറ്റാനായി പോയതായിരുന്നു. ഈ സമയത്ത് ലിഫ്റ്റിൻ്റെ വയർ റോപ്പ് പൊട്ടി ലിഫ്റ്റ് താഴേക്ക് പതിച്ചു. നസീർ ഈ ലിഫ്റ്റിൻ്റെ അടിയിൽ പെടുകയായിരുന്നു. ഫയർഫോഴ്സും നാട്ടുകാരും തൊഴിലാളികളും ചേർന്ന് യന്ത്രത്തിന്റെ സഹായത്തോടെയാണ് ലിഫ്റ്റ് ഉയർ ത്തിയ ശേഷം നസീറിനെ പുറത്തെടുത്തത്.
